Read Waray Samarenyo Meaning Based Job 2 Bible Online

Job 2 - Waray Samarenyo Meaning Based bible

Job 2

¹Han pag-abot na liwat han adlaw nga mapakita an langitnon nga mga binuhat ha atubangan han GINOO, nakadto upod gihapon ha ira hi Satanas.

²Ginpakianhan hiya han GINOO, “Tikang ka diin?” Binmaton hi Satanas, “Nagsinudoysudoy ako ngadto nganhi naglinayawlayaw ako ha bug-os nga tuna.”

³Nagpakiana an GINOO, “Hinkit-an mo ba hi Job nga akon surugoon? Waray gud usa dida ha tuna nga makakasugad ha iya hin kamatinumanon ngan kamaupay. Masingbahon hiya ha akon ngan mahirot hiya basi diri hiya makabuhat hin bisan ano nga maraot. Gin-aghat mo ako nga tugotan ko ikaw hin pagpaantos ha iya hin waray la hinungdan, kundi nagpabilin nga matinumanon gihapon hi Job.”

⁴Binmaton hi Satanas, “Ihahatag hin tawo an ngatanan nga iya mga butang basi la hiya mabuhi.

⁵Kundi pananglit lub-on mo hin sakit an iya lawas, waray ruhaduha pagmamaldisyonon ka niya hin tinuod.”

⁶Sanglit nagsiring an GINOO kan Satanas, “Sigi, aada hiya han imo gahom, kundi ayaw baya hiya pagpataya.”

⁷Niyan linmakat hi Satanas tikang ha atubangan han GINOO. Ginluob ni Satanas an lawas ni Job hin mga magbaho nga kapithok ug hubag tikang han rapadapa ngadto ha alimpupuno.

⁸Linmingkod hi Job dida han harapilan hin mga sighot ngan kinmuha hiya hin bika para pagkalot han iya mga kaduntan.

⁹Nagsiring ha iya an iya asawa, “Magpapadayon ka la gihapon hin kamatinumanon? Kay ano nga diri mo pagmaldisyonon an Dyos, ngan mamatay nala?”

¹⁰Binmaton hi Job, “Diri ka nasabot han imo ginyiyinakan! Kon nagpapadara an Dyos ha aton hin kaupayan, aton ini kinakarawat. Kay ano nga magngungurotob kita kon nagpapadara hiya hin kakurian?” Bisan pa dida ha butnga han iya mga pag-antos, waray gud hi Job magyakan hin bisan ano nga pagpasulabi han Dyos.

¹¹An tulo han mga sangkay ni Job amo hira Elipaz nga taga syudad han Teman, Bildad nga taga tuna han Sua, ug Sopar nga taga tuna han Naama. Han pakabati nira han makuri hin duro nga gin-inantos ni Job, nakahunahuna hira hin pagduaw ngan pagliaw ha iya.

¹²Han hirayo pa hira, hinkit-an nira hi Job, kundi waray hira makakilala ha iya. Han pakakilala na nira ha iya, nagtangis ngan nagnguyngoy hira; ginggisi nira an ira mga panapton tungod hin kabido ngan nagsabrag hin tapotapo ngadto ha igbaw ngan ngada han ira mga ulo.

¹³Niyan linmingkod hira dida ha tuna upod kan Job sulod hin pito ka adlaw ug gab-i nga waray yakanyakan, kay hinkit-an nira an makalilisang nga iya mga gin-aantos.