Read Waray Samarenyo Meaning Based Job 21 Bible Online

Job 21 - Waray Samarenyo Meaning Based bible

Job 21

¹Pamati han akon igyayakan; amo la ito nga butang nga makakaliaw ha akon an akon pinangangaro ha iyo.

³Tagi ako hin higayon hin paghimangraw ngan niyan, kon tapos na ako, pagbiaybiaya ako niyo kon karuyag niyo.

⁴Diri ako nakikiglantugi hin mga tawo nga may-ada kamatayon; may-ada ko maupay nga rason hin diri na pakaantos.

⁵Tan-awa daw ako niyo. Diri ba ito igo nga makatutok kamo ha akon upod in paghipausa ug paghilom?

⁶Kon ginhuhunahuna ko an nahinabo ha akon, kinakalosan ako, ngan kinukulba ngan nangungurog ako.

⁷Kay ano nga tinutugotan man han Dyos nga mabuhi an magraot nga mga tawo ngan malagas ngan magmainuswagon hira?

⁸May nira mga anak ngan mga apo, ngan nakakakita pa hira han pagtubo han ira mga anak ug mga apo.

⁹Diri an Dyos nagdadara hin karat-an ngadto han ira mga balay; diri gud hira mag-uokoy ha kahadlok.

¹⁰Tinuod, nagdadamo an ngatanan nira nga kabakahan ngan nag-aanak hin waray naninimangno.

¹¹Nagdadadlagan ngan nag-uurugyag an ira mga anak sugad hin mga nati nga karnero

¹²ngan nagsasarayaw dinuyogan han tokar hin mga arpa ngan mga plawta.

¹³Malinawon an bug-os nira nga kinabuhi, ngan namamatay hira nga murayaw ngan waray pag-antos.

¹⁴Masiring ha Dyos an mga magraot nga tawo nga pabay-an la hira; diri nira karuyag nga mahibaro hira han kaburot-on han Dyos para han ira mga kinabuhi.

¹⁵Naghuhunahuna hira nga waray nira kinahanglan hin pag-alagad han Dyos, ngan waray makukuha nga kaupayan an pag-ampo ha iya.

¹⁶Nasiring hira nga an pag-uswag nira pinaagi la han ira kalugaringon nga kusog, kundi diri ako makakauyon han ira panhunahuna.

¹⁷Naparong na ba an kapawa hin maraot nga tawo? Nahingadto na ba hin karat-an in usa ha ira? Ginkastigo na ba han Dyos an mga magraot, ha iya kasina,

¹⁸ngan ginpalid na ba hira han hangin sugad hin uhot o sugad hin tapotapo nga pinapalid hin alipuros?

¹⁹Nasiring kamo nga kinakastigo han Dyos in usa nga anak tungod han mga sala han iya amay. Diri! Ipakastigo han Dyos an mga nakakasala ngahaw; ipakita ini niya nga iya ini ginbubuhat tungod han ira mga sala.

²⁰Paantosa han ira kalugaringon nga kastigo an mga makasasala; paabata hira han kapungot han Dyos nga Labi Kamakagarahum.

²¹Kon tapos na an kinabuhi hin usa ka tawo, nababaraka ba hiya kon ano an dadangatan han iya mga anak?

²²Makakagtutdo ba han Dyos in usa ka tawo, han Dyos nga naghuhukom bisan hadton aadto ha kahitas-an?

²³May mga tawo nga nagpapabilin ha maupay nga panlawas ngada han ira kamatay; napatay hira nga malipayon ngan himyang, ngan libsog an ira mga lawas.

²⁵Waray gud kalipay an iba; nabubuhi ngan napatay hira nga mabidoon an ira mga kasingkasing.

²⁶Kundi an ngatanan waray hini pinili, napatay ngan iginlulubong; napuputos hin mga ulod hira ngatanan.

²⁷Maaram ako han madumtanon niyo nga mga panhunahuna.

²⁸Napakiana kamo, “Hain na man yana an balay han dako nga pagkatawo, an tawo nga nagbuhat hin maraot?”

²⁹Waray pa ba kamo pakighimangraw hin mga tawo nga naglalakaton? Diri ba kamo maaram han mga sumat nga ira dara ha ira pagbalik?

³⁰Dida han adlaw nga nasisina ngan nagkakastigo an Dyos, an maraot nga tawo amo lugod an nahigagawas.

³¹Waray nagsusumbong hin maraot nga tawo, o nabulos ha iya han ngatanan nga iya nabuhat.

³²Kon gindadara na hiya ngadto han lubnganan, ngadto han iya lubnganan nga binantayan hin maupay,

³³nabunyog hin paglubong in yinukot nga mga tawo, ngan bisan an tuna naghihirot nga diri makabug-at han iya lawas.

³⁴Ngan kamo! Nagtitinguha kamo hin pagliaw ha akon pinaagi hin kalurongan! Buwa an ngatanan nga iyo hinahatag nga baton!