Read Waray Samarenyo Meaning Based Job 24 Bible Online

Job 24 - Waray Samarenyo Meaning Based bible

Job 24

¹Kay ano nga diri an Dyos nagtatalaan han panahon hin paghukom, han adlaw hin katadungan para hadton mga nag-aalagad ha iya?

²Ginbabalhin hin mga tawo an mga tigaman hin pag-ultan basi la makaangkon hin hiruhiluag nga tuna; nangangawat hira hin mga karnero ngan itinatampo ini han ira kalugaringon nga mga panon.

³Kinukuha nira in mga asno nga gintatag-iya hin mga ilo, ngan kinakaptan nira an baka hin balo nga babaye ngada han iya pakabayad han iya utang.

⁴Diri nira tinutugotan nga an mga kablas makaangkon han ira mga katungod, ngan ginpipirit nira an mga makalolooy hin pagdalagan ngan pagtago.

⁵Sanglit an mga kablas, sugad hin ihalas nga mga asno, namimiling hin pagkaon didto han mamara nga kamingawan; waray na iba nga dapit nga ira pagbibilngan hin pagkaon para han ira mga anak.

⁶Mag-aani hira hin mga uma nga diri ira[49] ngan manmumuro hira hin mga ubas didto han mga urubasan hin magraot nga mga tawo.

⁷Ha gab-i nakaturog hira nga waray ngani taklap, waray gud bisan ano nga sadang igpapaso ha ira ha panahon han kathagkot.

⁸Nahuhumog hira han uran didto han kabukiran, ngan nagdadaisog hira hin pagsirong ha ligid han kababtoan.

⁹Gin-ooripon hin magraot nga mga tawo in mga minasus-an nga waray mga amay, ngan kinukuha nira an mga anak han kablas nga tawo sugad nga bayad hin mga utang.

¹⁰Kundi magawas hin pagbuhat an mga kablas bisan kon waray mga bado nga igsusul-ot nira; nag-aani hira hin trigo bisan kon ginugutom hira.

¹¹Nagpipii hira hin mga olibo para hin lana, ngan mga ubas para hin bino, kundi hira ngahaw an inuuhaw.

¹²Naghaharoy didto han mga syudad an mga ginsamad ngan mga tikamaratay, kundi diri pinamamatian han Dyos an ira mga pag-ampo.

¹³May-ada mga tawo nga nagsisikway han kapawa; diri hira nasabot o nasunod han pagtugway ha ira han kapawa.

¹⁴Ha kaagahon nabangon ngan nagawas an parapamatay hin pagpatay han pobre, ngan ha gab-i, nagawas hin pangawat.

¹⁵Naghuhulat han kakurolpon an parapanlibog; tinatahoban niya an iya bayhon basi diri hiya kilal-on.

¹⁶Ha gab-i nasulod hin kabablayan an mga kawatan, kundi ha adlaw natago hira ngan nalikay han kapawa.

¹⁷Nahadlok hira han kapawa han adlaw, kundi diri nakakapahadlok ha ira an kasisidman.

¹⁸[50]Igin-aanod ha baha an maraot nga tawo, ngan mamaldisyonon han Dyos an tuna nga iya gintatag-iya; diri na gud hiya nagbubuhat didto han iya mga urubasan.

¹⁹Sugad nga natutunaw an yelo tungod han kapaso ngan huraw, nawawara man an makasasala tikang han tuna han mga buhi.

²⁰Diri na nahinunumdom ha iya bisan pa ngani an iroy niya; kinakaon hiya hin mga ulod ngan nadudunot sugad hin gabok nga kahoy.

²¹Nahinanabo ini kay ginraogdaog niya an mga balo nga kababayen-an ngan waray niya kaluoyi an baw-as nga kababayen-an.

²²Pinaagi han iya kusog, binubungkag han Dyos an mga gamhanan; ginbubuhat ini han Dyos, ngan namamatay an maraot nga tawo.

²³Bangin tugotan hiya han Dyos hin pag-ukoy nga himyang, kundi ginbabantayan hiya ha ngatanan nga panahon.

²⁴Magmamainuswagon hin madaliay la an maraot nga tawo, kundi unina nalalaya hiya sugad hin banwa, sugad hin gingarab nga uhot.

²⁵May-ada ba makakaglirong hini? May-ada ba makakagpanhimuwa ha iyo han akon mga pulong?