Read Waray Samarenyo Meaning Based Job 26 Bible Online

Job 26 - Waray Samarenyo Meaning Based bible

Job 26

¹Pagkadako mo nga bulig ha akon— ako nga makalolooy, ngan maluya nga tawo!

³Nahatag ka hin sugad ka maupay nga sagdon ngan napaangbit ka han imo hibaro ngadto hin usa nga lurong nga sugad ha akon!

⁴Hin-o man ha imo paghunahuna an mamamati han ngatanan mo nga mga pulong? Hin-o ba an nagdasig ha imo hin paghimangraw hin sugad hini?

⁵[51]Nakurog an mga espiritu han mga patay didto han katubigan ha ilarom han tuna.

⁶Dayag sa Dyos an kalibutan han mga patay; waray nakakasalipod han iya pagkita.

⁷Ginbitad han Dyos an amihanan nga bahin han langit, ngan ginpalutaw an tuna dida hin kawadahan.

⁸An Dyos amo an nahatag hin tubig han mga dampog, ngan nagpupugong nga diri maburit an mga dampog tungod han kabug-at han tubig.

⁹Tinatago niya an kadayaw nga bulan didto ha luyo hin dampog.

¹⁰Ginlain niya an kapawa tikang han kasisidman, pinaagi hin iya iginbagis nga nalibot ha bawbaw han kadagatan.

¹¹Kon ginbabay-og niya an mga harigi nga natukod han langit, nangungurog ini hin kahadlok.

¹²An iya gahom amo an nakadaog han dagat,[52] pinaagi han iya kabatiran ginpukan niya an higante nga mananap nga hi Rahab.[53]

¹³An iya ginhawa amo an nakapahayag han langit, ngan an iya kamot amo an nagpatay han napalagiw nga higante nga mananap.[54]

¹⁴Kundi mga tigaman la ini han iya gahom, an mga huring la nga aton hinbatian. Hin-o gud an makakasabot han tinuod nga pagkagamhanan han Dyos?