Read Waray Samarenyo Meaning Based Job 27 Bible Online

Job 27 - Waray Samarenyo Meaning Based bible

Job 27

¹Nagsusumpa ako pinaagi han buhi nga Dyos nga Labi Kamakagarahum nga nadiri paghatag ha akon hin katadungan ngan nagpapaantos han akon kinabuhi—

³samtang tinatagan pa ako han Dyos hin kinabuhi,

⁴diri gud magyayakan an akon mga im-im hin bisan ano nga maraot, diri gud magbubuwa an akon dila.

⁵Diri gud ako masiring nga waray niyo sayop nga mga tawo; magpapadayon ako hin pag-ugop han akon kawaray sala tubtob han akon kamatay.

⁶Diri gud ako matangdo nga sayop ako; mahawan an akon konsensya.

⁷Kastigohon unta sugad hin magraogdaog ngan diri magtadong nga mga tawo an ngatanan nga naato ngan nakikiaway ha akon.

⁸Ano ba an paglaom han diri nakilala hin Dyos nga mga tawo ha takna nga aaroan hira han Dyos hin kasayoran han ira kinabuhi?

⁹Kon naabot an kakurian, pamamatian ba han Dyos an ira mga pagsangpit?

¹⁰Naungara unta hira han kalipay nga iya ihinahatag; nag-ampo unta hira hin dayuday ha iya.

¹¹Tugoti ako hin pagtutdo ha iyo han pagkadako han gahom han Dyos, ngan hin pagsaysay han iginlarang han Dyos nga Labi Kamakagarahum.

¹²Sanglit diri ko ini bubuhaton kay kamo ngahaw nakakita man hini. Kay ano nga nagyayakan kamo hin sugad nga kalurongan?

¹³[55]Sugad hini an pagkastigo han Dyos nga Labi Kamakagarahum han magraot ngan mag-isog nga mga tawo.

¹⁴Bangin damo an ira mga anak nga kalalaken-an, kundi magkakamatay ha pag-awayan hira ngatanan; an ira mga kabataan waray igo nga pagkaon.

¹⁵Mapatay hin sakit adton mga nahisasalin nga buhi, ngan bisan an ira mga balo nga kababayen-an diri magmamasulob-on tungod han ira pagkamatay.

¹⁶Bangin damo hin duro an salapi nga pag-iihapon han mga magraot, ngan darudamo nga mga panapton kay han ginkikinahanglan han tawo;

¹⁷kundi iba nga maupay nga tawo an magsusul-ot han mga panapton, ngan iba nga tangkod nga tawo an magdadara han ira salapi.

¹⁸Nagtitindog an mga magraot hin mga balay nga sugad hin balay hin lawalawa[56] o sugad han payag hin usa nga oripon nga nagbabantay han kaumhan.

¹⁹Katapos han adlaw[57] mahigda hira nga riko, ngan ha ira pagmata, waray na an ira mga manggad.

²⁰Malilisang hira tungod hin kahadlok nga sugad hin tigda nga baha; igpapalid hira hin hangin ha kagab-ihon.

²¹Ipapalid hira tikang han ira mga balay han hangin nga kabunghan;

²²aagmakan hira hini hin waray pagkalooy, samtang nagtatalinguha gud hira hin pagkalagiw.

²³Mapuros an hangin ha ira samtang nagdadadlagan hira, ngan ginhahadlok hira hin makalilisang nga gahom.