Read Waray Samarenyo Meaning Based Job 28 Bible Online

Job 28 - Waray Samarenyo Meaning Based bible

Job 28

¹[58] May-ada mga mina diin gin-uukab an salapi; may-ada mga dapit diin ginpupurog an bulawan.

²Gin-uukab han mga tawo an puthaw tikang ha tuna, ngan gintutunaw an tumbaga tikang ha mga bato.

³Kinakadto han mga tawo an gihihilaromi nga kasisidman. Gin-uusisa nira an mga kahiladman han tuna ngan gin-uukab nira in mga bato didto han kasisidman.

⁴Hirayo hin mga puroy-anan hin tawo, ug mga aragian ngan baktasan hin mga tawo, didto nagmimina an mga tawo. Didto nagtratrabaho hira butnga hin kamingaw, nakapyot hin mga pisi.

⁵Naturok an pagkaon ngatanan ha bawbaw han tuna, kundi ha ilarom han tuna ngahaw ginpupusak ngan gindudugmok an ngatanan.

⁶May mga safiro an mga bato han tuna, ngan may bulawan an tapotapo hini.

⁷Waray banog nga nakakakita han mga baktasan ngadto han mga mina, ngan waray gud manaol nga nalupad ha igbaw hini.

⁸Waray gud liyon o iba nga ihalas nga mananap nga naglalakat hito nga mamingaw nga mga baktasan.

⁹Nag-uukab an mga tawo han bantilis nga mga bato, nagpapangas hira hin mga bukid.

¹⁰Ha ira paglungag han bukid, nakakaagi hira hin mahal nga mga bato.

¹¹Nag-uukab hira tubtob han mga surok hin[59] mga salog, ngan gindadara nira ha gawas an natatago.

¹²Kundi hain man hiaagii an kinaadman? Hain man naton hibabaroi an pagsabot?

¹³Diri hiaagian an kinaadman dida han mga tawo; waray maaram han matuod nga pulos hini.

¹⁴An mga kahiladman han kalalawdan ngan kadagatan nasiring nga diri hiaagian didto an kinaadman.

¹⁵Diri ini mapapalit hin salapi o bulawan.

¹⁶Diri makakatupong han kamahal hini an gimamahali nga bulawan ngan mga alahas.

¹⁷Labaw pa kay han bulawan an kamahal hini, kay hin bulawan nga surudlan o gimamaupayi nga salaming.

¹⁸Labaw pa hin kamahal an kinaadman kay han koralino o kristal o mga rubi.

¹⁹Diri makakatanding han kamahal han kinaadman an gimamaupayi nga topasyo ngan an gipupurawi nga bulawan.

²⁰Hain man ngay-an an burabod han kinaadman? Hain man naton hibabaroi an pagsabot?

²¹Waray buhi nga binuhat nga makakakita hini, bisan ngani in tamsi nga nalupad.

²²Bisan an kamatayon ug kabungkagan nasiring nga hinbatian la nira in mga sumat-sumat.

²³An Dyos la an maaram han dalan, hiya la an maaram han dapit diin hiaagian an kinaadman,

²⁴Kay nakita hiya han mga kataposan han tuna, Nakita hiya han ngatanan ha ilarom han kalangitan.

²⁵Dida nga gintagan han Dyos hin gahom an hangin, dida nga ginlarang niya an kahiluag han dagat;

²⁶Dida nga ginlarang han Dyos kon diin mahuhulog an uran, ngan kon diin paaagia an mga dampog nga nagdadara hin lilinti;

²⁷Dida hini kinita niya an kinaadman ngan ginsarihan kon pagpupulsan ba ini— naruyag hiya ngan iya ginmahal.

²⁸Nagsiring an Dyos ngadto han mga tawo, “Basi kamo magmakinaadmananon, kinahanglan tahoron niyo an Ginoo. Basi kamo makasabot, kinahanglan bayaan niyo an maraot.”