Read Waray Samarenyo Meaning Based Job 29 Bible Online

Job 29 - Waray Samarenyo Meaning Based bible

Job 29

¹Naghimangraw na liwat hi Job.

²Maupay unta kon mahibalik pa an akon kinabuhi sugad hadto nga kahimtang nga ginbabantayan pa ako han Dyos.

³Dayuday kaupod ko an Dyos hadto, ngan naghatag hiya ha akon hin kapawa ha paglatas ko han kasisidman.

⁴Amo adto an mga adlaw nga mainuswagon ako, ngan an pakigsangkay han Dyos nakapanalipod han akon panimalay.

⁵Kaupod ko hadto an Dyos nga Labi Kamakagarahum, ngan kalungon ha akon an akon mga anak.

⁶Hinmatag an akon mga baka ngan mga kanding hin damo nga gatas, ngan tinmurok an akon mga olibo didto han uraura kabatoon nga mga tuna.

⁷Kon may-ada katirok an mga katigurangan han syudad, ngan nalingkod ako tampo ha ira,

⁸napiliw dayon an batan-on nga kalalaken-an kon nakita hira ha akon, ngan natindog an mga kalagsan hin pagtahod ha akon.

⁹Naukoy pagyakan an mga pangulo han mga tawo;

¹⁰nahilom bisan pa an labi ka dumagko nga mga tawo.

¹¹An ngatanan nga nakita ha akon ngan nabati hiunong ha akon, may mag-upay nga mga sumat hiunong han akon nabuhat.

¹²Kon natawag an mga kablas, nabulig ako ha ira; ginbuligan ko an mga ilo nga waray dinadangpan.

¹³Gindayaw ako hin mga tawo nga makalolooy hin duro, ngan ginbuligan ko in mga balo nga kababayen-an basi hiagian nira in kahimyangan.

¹⁴Dayuday matadong ngan maupay an akon panggawi.

¹⁵Mga mata ako para han mga buta, ngan mga tiil ako para han mga piay.

¹⁶Sugad ako hin amay para han mga kablas ngan inugopan ko an mga diri kinikilala nga nagkukuri.

¹⁷Ginbungkag ko an gahom hin magtalumpigos nga mga tawo ngan gintabangan ko an ira mga ginraogdaog.

¹⁸Dayuday naglalaom ako nga mahilawig an akon kinabuhi, ngan aadto ako ha balay mapatay nga murayaw an akon panhunahuna.

¹⁹Sugad ako hin usa nga kahoy kanay mga gamot dayuday natatagan hin tubig, ngan kanay mga sanga nahuhumog hin tun-og.

²⁰Dayuday hadto gindadayaw ako han ngatanan, ngan waray gud ako lumuya.

²¹Kon nasagdon ako, nahilom an mga tawo ngan namamati hira hin maupay han akon ginyayakan;

²²waray na hira sadang igdugang kon human na ako pagyakan. Nasalupsop an akon mga pulong sugad hin mga turo hin uran;

²³kinakarawat ini han ngatanan, sugad han pagkarawat han mga parauma hin uran nga diri pa naabot an katsirak.

²⁴Nahiyom ako ha ira kon nawad-an na hira hin pagtapod; nakapadasig ha ira an mahiyomhiyom ko nga bayhon.

²⁵Nangulo ako ngan ako ngahaw an naghimo han mga kaladnganan; gindumara ko hira sugad han hadi nga nagdudumara han iya mga kasondalohan, ngan ginliaw ko hira dida han ira kabidoan.