Read Waray Samarenyo Meaning Based Job 3 Bible Online

Job 3 - Waray Samarenyo Meaning Based bible

Job 3

¹Katapos hini nagyakan hi Job ngan ginmaldisyon niya an adlaw nga iya natawhan.

²O Dyos, maldisyona gad an adlaw nga akon natawhan; ngan an gab-i nga iginpanamkon ha akon!

⁴Himoa nga kasisidman ito nga adlaw, O Dyos. Ayaw na gud hinumdomi ito nga adlaw; ayaw na gud ini paglamragi.

⁵Himoa ini nga adlaw hin kadulman ngan madakmol nga kasisidman; tahobi ini hin mga dampog ngan talinguhaa nga maanaw an adlaw.

⁶Paraa ito nga gab-i tikang han tuig, ngan ayaw na gud ini ipaupod han ihap;

⁷himoa ini nga mabidoon ngan waray kalipay nga gab-i.

⁸Sugoa an mga diwatahan hin pagmaldisyon hito nga adlaw, hira nga mag-aram magmanso han Lebiatan.[6]

⁹Pugngi hin pagsirang an makabugwas; ayaw itugot nga may-ada kaagahon kahuman han gab-i.

¹⁰Maldisyona ito nga gab-i nga amo an nagpakatawo ha akon, ngan naghatag ha akon hin kakurian ngan kabidoan.

¹¹Gabay pa namatay ako ha sakob han tiyan han akon iroy, o namatay ha takna han akon katawo.

¹²Kay ano nga ginsaluro ako han akon iroy ha iya mga tuhod? Kay ano nga ginpasuso ako niya?

¹³Kon namatay ako hadto, napahuway na unta ako yana,

¹⁴nakaturog sugad han kahadian ngan mga punoan nga nag-ayad hin kadaan nga mga palasyo.

¹⁵Niyan nakaturog na unta ako sugad hin mga prinsipe nga nagpuno han ira mga balay hin bulawan ug salapi,

¹⁶o nakaturog sugad hin bata nga natawo nga daan patay.

¹⁷Didto ha lubnganan nahunong na an karat-an han magraot nga mga tawo, ngan ha kataposan napahuway na an binubutlaw nga mga magburudlay.

¹⁸Nagpapahimulos hin kalinaw bisan an mga priso, nga diri na nabati han mga goliat ngan mag-isog nga mga sugo.

¹⁹Aadto an ngatanan, an bantogan ngan an diri kinikilala, ngan ha kataposan talwas na an mga oripon.

²⁰Kay ano nga ginbubuhi an mga tawo basi la mag-antos? Kay ano nga tinatagan pa hin kapawa an mga tawo nga aada ha kabidoan?

²¹Naghuhulat hira han kamatayon, kundi diri man ini naabot; Gabay nira angkonon in usa nga lubnganan kay hin bisan ano nga manggad.

²²Diri hira malipayon tubtob nga patay ngan iginlubong na hira;

²³ginlilirong han Dyos an ira kabubwason ngan ginpipiit hira ha bisan diin nga dapit.

²⁴Pagkaon unta an akon tuyo, nagmamabidoon lugod ako, ngan diri gud ako nakakahunong hin pagharoy.

²⁵Nahinanabo an ngatanan nga akon nahahadlokan ngan nalilisangan.

²⁶Waray ko kalinaw, waray pagpahuway, ngan diri gud natatapos an akon mga kakurian.