Read Waray Samarenyo Meaning Based Job 30 Bible Online

Job 30 - Waray Samarenyo Meaning Based bible

Job 30

¹Kundi yana gin-iinintrimisan na la ako hin mga tawo nga marumanghod kay ha akon! Kanunay waray gamit an ira mga amay nga diri ko ngani karuyag nga bumulig hira han akon kaayaman hin pagbantay han mga karnero.

²Hugpo hira hin guol na nga mga tawo, nga magluya na hin duro hin pagbudlay para ha akon.

³Mga kablas ngan uraura hira hin ka mga gutom, nga nakibkib hira hin uga nga mga gamot— ha gab-i didto hin mga kamingawan.

⁴Ginggabot ngan ginkaon nira an mga tanom ha kamingawan, bisan an waray rasa nga mga gamot han tangbo!

⁵Gintabog hira han ngatanan pinaagi hin mga gogliat, sugad hin nagoliat hira ngadto hin mga kawatan.

⁶Nag-ukoy hira didto hin mga lungib, didto hin mga kalungagan ha mga ligid hin mga umpas.

⁷Nauwang sugad hin kamanampan didto ha kagurangan, ngan nagpupurundok hira ha ilarom han mga kabagwakan.

⁸Usa nga waray la pulos nga hugpo hin waray gud gamit nga mga tawo! Ginpaiwas hira tikang han tuna.

⁹Yana naabot hira ngan ira ako gintitinawaan; irintrimisan na gudla ako nira.

¹⁰Dinidiri ako nira; an ira hunahuna nga diri na ako naangay para ha ira, ngan nakanhi pa ngani hira hin pagtupra han akon bayhon.

¹¹Tungod nga ginhimo ako han Dyos nga maluya ngan makalolooy, tinmalikod hira ha akon ha bug-os nira nga kapungot.

¹²Sinusulong ako hini nga masamok nga hugpo; ginsisibo ako nira; gin-aandam nira an ira kataposan nga pagsulong.

¹³Gin-uulang nira an akon pagpalagiw ngan gintitinguha nira hin pagsamad ha akon; ngan waray gud nakakapugong[60] ha ira.

¹⁴Nalusot hira ha mga buho dida han akon mga panalipdanan, ngan dinadasmagan ako nira.

¹⁵Dinadaog ako hin kahadlok. Nawawara sugad hin hangin an akon kaligdong, ngan sugad hin dampog an akon kauswagan.

¹⁶Yana tikamaratay na ako; waray pahalibway para han akon pag-antos.

¹⁷Ha gab-i mangutngot ngatanan an akon mga tul-an; diri gud nahunong an kaol-ol ngan an kamaundag.

¹⁸Ginrarabnot han Dyos an akon kwelyo ngan ginkukurumos an akon mga panapton.

¹⁹Linalabog ako niya ngadto han lunayan sugad nala ako hin lapok.

²⁰Nagtatawag ako ha imo, O Dyos, kundi diri ka gud nabaton; ngan kon nag-aampo ako, diri ka namamati.

²¹Ginraraogdaog mo ako; ginpakurian mo ako hin waray pagkalooy.

²²Iginpapalid mo ako han hangin; gin-bunalbunal mo ako dida hin makusog nga bagyo.

²³Maaram ako nga gindadara mo ako ngadto han akon kamatayon, ngadto han kasugaran nga gin-andam mo para han ngatanan.

²⁴Kay ano nga sinusulong mo in napukan na nga tawo, in usa nga waray na gud mahihimo kon diri an pakimalooy nala?[61]

²⁵Waray ba ako pagtangis para han mga tawo nga nagkukuri ngan magmabidoon para hadton mga nagkikinahanglan?

²⁶Naglaom ako hin kalipay ngan kapawa, kundi inmabot lugod in kakurian ngan kasisidman.

²⁷Ginsasamok ako hin kabaraka ngan kasakit; adlaw-adlaw an akon pag-antos.

²⁸Naglalakat ako ha kadulman, nga waray gud bisan ano nga kapawa han adlaw; natindog ako dida ha atubangan han mga tawo ngan nahangyo hin tambulig.

²⁹An akon tingog sugad kamabidoon ngan kamamingaw han malanoy nga pag-uwang hin usa nga lubo o hin duong.

³⁰Nangangapay na an akon panit; namamaso ako tungod hin hiranat.

³¹Kon hadto hinbatian ko in malipayon nga tokar, yana hinbabatian ko nala in kasubo ngan pagtangis.