Read Waray Samarenyo Meaning Based Job 31 Bible Online

Job 31 - Waray Samarenyo Meaning Based bible

Job 31

¹Nagsumpa ako hin diri na gud pagsiplat hin daraga tungod hin kaipa.

²Ano an ginbubuhat ha aton han Dyos nga Labi Kamakagarahum? Gin-uunan-o niya hin pagbalos han mga buhat han tawo?

³Nagpapadara hiya hin karat-an ngan kabungkagan ngadto han mga nagbubuhat hin maraot.

⁴Maaram an Dyos han ngatanan nga akon ginbubuhat; nakita hiya han tagsa nakon nga pagpitad.

⁵Nagsusumpa ako nga waray gud ako makabalot hin maraot, ngan waray gud ako maglimbong han iba nga mga tawo.

⁶Mahihimo nga ibutang ako han Dyos dida hin tuptop nga mga timbangan, ngan makita hiya nga waray ako sala.

⁷Kon sinmimang ako han matadong nga dalan, o nagpalukmay ako han maraot, kon nahugawan hin sala an akon mga kamot,

⁸niyan puoha an akon mga abot, o ipakaon hin iba an akon mga tanom.

⁹Kon naipa ako han asawa han akon amyaw, ngan naghulat ako nga natago ha gawas han iya porta,

¹⁰niyan mahimo nga an akon asawa magluto hin pagkaon para hin lain nga tawo ngan mahimo nga dumirig hiya hin lain nga tawo.

¹¹Angay pagkastigohon hin kamatayon in sugad nga karat-an.

¹²Masusugad ini hin makaburungkag nga kalayo ha impyerno nga mag-uugtang han ngatanan nga akon mga butang.

¹³Kon nangurutob kontra ha akon in usa han akon mga surugoon, pinamamatian ko hiya ngan inuupay ko an akon pagdara ha iya.

¹⁴Kon waray ko ini pagbuhata, uunanhon ko hin pakaatubang han Dyos? Ano an akon isisiring kon kumanhi na an Dyos hin paghukom ha akon?

¹⁵An Dyos nga nagtuha ha akon amo ngahaw an nagtuha han akon mga surugoon.

¹⁶Waray gud ako dumiri hin pagbulig han mga kablas; waray gud ako tumugot nga magturaw ha ira kinabuhi an mga balo nga kababayen-an,

¹⁷o tumugot nga gutomon an mga ilo samtang nakaon ako.

¹⁸Ginmangnoan ko hira ha bug-os ko nga kinabuhi.[62]

¹⁹Kon hin-agian ko in usa nga makalolooy, nga makuri makapalit hin panapton,

²⁰tinatagan ko hiya hin bado nga delana nga hinimo han barahibo han kalugaringon ko nga panon hin mga karnero. Ngan gindadayaw ako niya ha bug-os nga kasingkasing.

²¹Kon nakalimbong ako hin ilo, tungod kay maaram ako nga makakadaog ako didto ha hukmanan,

²²niyan mabari unta an akon mga butkon; matangtang unta ini ha akon mga sugbong.

²³Tungod nga nahahadlok ako han kastigo han Dyos, diri gud ako makakagbuhat hin sugad nga butang.

²⁴Waray gud ako sumarig han karikohan,

²⁵o pumarayaw han akon manggad.

²⁶Waray gud ako magsingba han adlaw dida han iya kamapawa, o han bulan dida han iya bug-os nga kamatahom.

²⁷Waray ako mahugay hin pagpasidungog ha ira pinaagi hin pagharok han akon kamot hin pagpakita han akon pagsingba ha ira.

²⁸Angay pagkastigohon hin kamatayon in sugad nga sala; usa ini nga paglinong han Dyos nga Labi Kamakagarahum.

²⁹Waray gud ako malipay han pag-antos han akon mga kaaway, o malipay han pahingadto hira ha karat-an;

³⁰waray gud ako makasala pinaagi hin pag-ampo nga mamatay hira.

³¹Maaram an ngatanan nga mga tawo nga nagtrabaho para ha akon nga dayuday ginkarawat ko an mga diri kinikilala nga tawo.

³²Gindapit ko ngadto han akon balay an mga naglalakaton, ngan waray ko gud hira tugoti nga kumaturog dida han kakalsadahan.

³³An iba nga mga tawo nagtatago han ira mga sala, kundi waray ko gud ini pagbuhata.

³⁴Waray gud ako mahadlok han igsisiring han mga tawo hiunong ha akon; waray gud ako maghilom o mag-inukoy la ha sulod han balay, kay diri ako nahahadlok han ira pagtamay.

³⁵Waray ba mamamati han akon iginyayakan? Nagsusumpa ako nga matuod an tagsa nga pulong. Pabatona ha akon an Dyos nga Labi Kamakagarahum. Kon an mga sumbong nga ginsalawad han akon kaaway kontra ha akon iginsurat la basi mabasa ko ini,

³⁶ipaparayaw ko ini dida han akon sugbong, ngan isusul-ot ko ini ha akon ulo sugad hin korona.

³⁷Igsusumat ko ha Dyos an ngatanan nga akon ginbuhat, ngan matindog ako hin waray kahadlok ha iya atubangan.

³⁸Kon kinawat ko an tuna nga akon gin-uuma ngan inagaw ko ini han mga matuod nga tag-iya hini—

³⁹kon kinmaon ako han pagkaon nga gintanom didto, kundi pinagutoman ko an mga parauma nga nagpatubo hini—

⁴⁰niyan tumurok unta in kabanwaan ngan katungkan nga liwan han gintanom nga trigo ug sebada. Natapos an mga pulong ni Job.