Read Waray Samarenyo Meaning Based Job 32 Bible Online

Job 32 - Waray Samarenyo Meaning Based bible

Job 32

¹Tungod nga gindig-onan man hi Job nga waray niya sala, hinmunong hin pagbaton kan Job an tulo ka tawo.

²Kundi may tawo nga nagpipinamati nga ginngaran kan Elihu, nga waray na gud pakakapugong han iya kasinahon, kay ginpakamatadong man ni Job an iya kalugaringon ngan ginbasol niya an Dyos. (Anak hi Elihu ni Barakel nga tulin ni Buz, ngan sakop han banay ni Ram.)

³Nasina liwat hiya han tulo nga kasangkayan ni Job. Waray na gud hira pakakabaton kan Job, ngan nagpakita ini nga daw sayop an Dyos.

⁴Tungod nga hi Elihu an gimamanghuri ha ira didto, hinmulat hiya tubtob nga nahuman hin paghimangraw an ngatanan.

⁵Han pakakita niya nga waray pakakabaton kan Job an tulo ka tawo, nasina hiya

⁶ngan nagtikang hiya hin paghimangraw. Batan-on pa ako ngan mga lagas na kamo, sanglit nahadlok ako hin pagsumat ha iyo han akon ginhuhunahuna.

⁷Nagsiring ako ha akon ngahaw nga kinahanglan maghimangraw kamo, nga kinahanglan magpaangbit han iyo kinaadman kamo nga tirutigurang nga mga tawo.

⁸Kundi an espiritu han Dyos nga Labi Kamakagarahum amo an napakada han mga tawo ngan nahatag ha ira hin pagsabot.

⁹Diri an pagtikalagas an nakakahimo han mga tawo nga makinaadmananon, o nakakabulig ha ira hin paghibaro han matadong.

¹⁰Sanglit yana karuyag ko nga mamati kamo ha akon; tugoti ako hin pagsumat ha iyo han akon ginhuhunahuna.

¹¹Namati ako nga mapinailobon samtang naghihimangraw kamo, ngan hinmulat ako samtang nangingita kamo hin makinaadmananon nga mga yayaknon.

¹²Namati ako hin maupay ngan hinbatian ko nga napakyas kamo; waray niyo panhimuwaa an iginsiring ni Job.

¹³Uunanhon niyo hin pakasiring nga hin-agian niyo an kinaadman? Kinahanglan batonon han Dyos hi Job, kay napakyas man kamo.

¹⁴Naghimangraw hi Job ha iyo, diri ngadi ha akon, kundi diri gud ako mabaton sugad han paagi nga iyo ginbuhat.

¹⁵Nawarayan na hira hin mga pulong, Job; waray na hira igbaraton ha imo.

¹⁶Maghihinulat la gihapon ako kon nahilom na hira? Natindog hira kundi waray na nira sadang igyakan.

¹⁷Diri, mabaton man liwat ako yana, ngan susumatan ko ikaw han akon ginhuhunahuna.

¹⁸Diri na ako makakahulat hin diri pagyakan, diri ko na napupugngan an akon mga pulong.

¹⁹Kon diri ako matagan hin higayon hin pagyakan, mabuto ako sugad hin anit nga surudlan nga puno hin bag-o nga bino.

²⁰Diri na ako makakailob; kinahanglan magyakan ako.

²¹Waray ako inuugopan dida hini nga lantugi; diri ako mag-uulog-ulog bisan kan kanay.

²²Diri ako maaram mag-ulog-ulog, ngan pagkakastigohon dayon ako han Dyos kon akon buhaton ini.