Read Waray Samarenyo Meaning Based Job 33 Bible Online

Job 33 - Waray Samarenyo Meaning Based bible

Job 33

¹Ngan yana, Job, pamatii hin maupay an ngatanan nga akon igsisiring.

²Andam na ako hin pagyakan han aadi han akon hunahuna.

³Tangkod an ngatanan ko nga mga pulong, ngan nagyayakan ako han kamatuoran.

⁴Ginhimo ako ngan gintagan hin kinabuhi han espiritu han Dyos.

⁵Batona ako kon makakahimo ka. Andama an imo mga pangatadongan.

⁶Ikaw ug ako waray kalainan ha atubangan han Dyos, kita nga duha ginhimo tikang hin lapok.

⁷Sanglit diri ka angay mahadlok ha akon; diri ko ikaw pagraraogdaogon.

⁸Iini an akon hinbatian nga imo siring:

⁹“Diri ako salaan; waray ko nabuhat nga sayop. Inosente ako ngan waray ko sala.

¹⁰Kundi namimiling hin mga pasangil an Dyos hin pagkontra ha akon, ngan gin-iisip ako niya sugad hin usa nga kaaway.

¹¹Kinakadenahan niya an akon mga tiil; binabantayan niya an tagsa ko nga pagkiwa.”

¹²Kundi, Job, pagsusumatan ko ikaw nga sayop ka. Labaw gud an Dyos kay han bisan hin-o nga tawo.

¹³Kay ano nga ginsasala mo an Dyos nga diri hiya nabaton han mga sumbong hin usa ka tawo?

¹⁴Bisan kon nagbalikbalik an Dyos hin pagyakan, waray namamati ha iya.

¹⁵Ha gab-i kon nangangaturog na an mga tawo, naghihimangraw an Dyos pinaagi hin mga inop ngan mga panan-awon.

¹⁶Gintitinguha niya nga mamati hira han iya iginyayakan, ngan nahahadlok hira han iya mga pahimatngon.

¹⁷Naghihimangraw an Dyos basi umukoy na hira hin pagpinakasala, ngan basi matalwas hira tikang han pagkamapinahitas-on.

¹⁸Diri hiya matugot nga mapukan hira; gintatalwas hira niya tikang han kamatayon.

¹⁹Sinasaway han Dyos in usa ka tawo pinaagi hin paghatag ha iya hin sakit ngan pagpaul-oli han iya lawas.

²⁰Nawawad-an hin gana an masakit nga tawo, ngan masukasuka para ha iya bisan an girarasahi nga pagkaon.

²¹Naggiginasa hin duro an iya lawas; hinkikit-an mo an ngatanan niya nga mga tul-an;

²²tikaradto na hiya han kalibutan han mga patay.

²³Bangin kumanhi in usa nga anghel hin pagbulig ha iya— usa han mga yinukot nga mga anghel han Dyos, nga nagpapahinumdom han mga tawo han ira katungdanan.

²⁴Tungod hin kalooy, masiring an anghel, “Buhii hiya! Diri hiya malusad ngadto han kalibutan han mga patay. Iini an lukat han pagtalwas ha iya.”

²⁵Magtitikabata ngan magtitikakusog na liwat an iya lawas;

²⁶kon mag-ampo hiya, mabaton ha iya an Dyos; pagsisingbahon niya nga malipayon an Dyos; para ha iya pagtatadongon na liwat han Dyos an ngatanan nga mga butang.

²⁷Magtutug-an hiya ha atubangan han mga tawo, “Nakasala ako. Waray ko pagbuhata an matadong, kundi gintalwas ako han Dyos.

²⁸Ginpugngan ako niya hin pagkadto han kalibutan han mga patay, sanglit buhi pa ako gihapon.”

²⁹Agsob pagbuhaton han Dyos ini ngatanan;

³⁰tinatalwas niya an kinabuhi hin usa ka tawo, ngan tinatagan hiya han kalipay hin matadong nga kinabuhi.

³¹Job, pamatii an akon iginyayakan; paghilom ngan payakna ako.

³²Kundi kon may-ada nimo igsisiring, pabatia ako hini; kakarawaton ko nga malipayon nga waray ka sayop.

³³Kundi kon diri, paghilom ngan pamatii ako, ngan pagtututdoan ko ikaw hin pagkamakinaadmananon.