Read Waray Samarenyo Meaning Based Job 34 Bible Online

Job 34 - Waray Samarenyo Meaning Based bible

Job 34

¹Makinaadmananon ngan listo gud kamo nga mga tawo; pamatii yana an akon iginyayakan.

³Hisasabotan niyo nga marasa an pagkaon kon tinitilawan niyo ini; kundi diri kamo mahibabaro hin makinaadmananon nga mga pulong kon mamati la kamo.

⁴Aada na ini ha aton an pagturotimbang kon hain an matadong.

⁵Nasiring hi Job nga waray nya sala, nga nadiri an Dyos hin paghatag ha iya hin katadongan.

⁶Napakiana hiya, “Uunanhon ko hin pakagbuwa ngan pakasiring nga sayop ako? Nasamad ako hin grabe kundi waray ako sala.”

⁷Kinmita na ba kamto hin tawo nga sugad kan Job? Waray gud niya pagtahod han Dyos.

⁸Karuyag niya hin pakigtampo hin magraot nga mga tawo, ngan pakig-inupod-upod hin mga makasasala.

⁹Nasiring hiya nga waray gudla kaupayan an pagsunod han kaburot-on han Dyos.

¹⁰Pamatii ako niyo, kamo nga mga tawo nga masinaboton! Nagbubuhat ba hin sayop an Dyos nga Labi Kamakagarahum?

¹¹Binabalos niya an mga tawo han ira ginbubuhat, ngan gindudumara hira sugad han angay ha ira.

¹²Diri nagbubuhat hin maraot an Dyos nga Labi Kamakagarahum; diri gud hiya nagraraogdaog bisan kan kanay.

¹³Kinuha ba han Dyos an iya gahom tikang hin iba nga tawo? May-ada ba nagbutang ha iya nga tinaporan han kalibutan?

¹⁴Kon bawion han Dyos an ginhawa han kinabuhi,

¹⁵magkakamatay an ngatanan nga buhi, ngan mabalik na liwat hira hin katapotapo.

¹⁶Yana pamatii ako niyo kon mga mag-aram man kamo.

¹⁷Ginhuhukman ba niyo an matadong nga Dyos? Naghuhunahuna ba kamo nga nadiri hiya kan katadongan?

¹⁸Ginhuhukman han Dyos in kahadian ngan mga punoan, kon waray mga pulos o mga magraot hira.

¹⁹Diri hiya nadapig hin mga punoan o nagpapalabi han mga riko labaw han mga pobre, kay gintuha niya an ngatanan.

²⁰Mahihimo mamatay hin tigda la ha gab-i in usa ka tawo. Hinahampak han Dyos in mga tawo ngan nagkakamatay hira. Diri makuri para ha iya in pagpatay han mga gamhanan.

²¹Binabantayan niya an tagsa nga pitad han mga tawo.

²²Waray kasisidman nga igo hin kamasirom nga in makasasala makatago tikang han Dyos.

²³Diri an Dyos magtatalaan hin panahon[63] nga kumadto ha iya an mga tawo basi niya paghukman.

²⁴Diri kinahanglan nga magpakiana hiya basi makuha in mga pangulo ngan liwanan hira hin iba.

²⁵Tungod nga maaram hiya han ira ginbubuhat, iya pinupukan ngan pinamamatay hira ha gab-i.

²⁶Kinakastigo niya an mga makasasala ha atubangan han ngatanan,

²⁷kay inmundang hira hin pagsunod ha iya, ngan ginpasibay-an nira an ngatanan niya nga mga sugo.

²⁸Ginpirit nira an mga pobre hin pagsangpit han Dyos, ngan hinbatian niya an ira mga pagtawag hin pakibulig.

²⁹Kon maglarang an Dyos hin diri pagbuhat, waray makakasuson ha iya. Kon talikdan niya an tawo, makalolooy gud an mga tawo.

³⁰Waray gud mahihimo han mga nasod hin pagpugong nga diri hira paghadian hin magraogdaog nga mga tawo nga diri nakilala hin dyos.

³¹Job, iginkompisal mo ba ngadto sa Dyos an imo mga sala, ngan nagsaad hin diri na pagpakasala?

³²Ginhangyo mo ba an Dyos nga ipakita niya ha imo an imo mga sayop, ngan tinmangdo ka ba hin diri na pagbuhat hin maraot?

³³Sugad nga nariwa ka man han ginbubuhat han Dyos, makakalaom ka ba nga pagbubuhaton niya an imo karuyag? Ikaw an pagbaton diri ako; sumati kami yana han imo ginhuhunahuna.

³⁴Mauyon gud an bisan hin-o nga may buot nga tawo; masiring an bisan hin-o nga makinaadmananon nga tawo nga namamati ha akon

³⁵nga ha iya katapang naghimangraw hi Job, ngan waray gudla hinungdan an iya iginyayakan.

³⁶Painuinoha daw an ngatanan nga ginyayakan ni Job; makakasabot kamo nga naghihimangraw hiya sugad hin maraot nga tawo.

³⁷Dinudugangan niya hin pagribok an iya mga sala; ginpapakaalohan niya an Dyos ha atubangan naton ngatanan.