Read Waray Samarenyo Meaning Based Job 36 Bible Online

Job 36 - Waray Samarenyo Meaning Based bible

Job 36

¹Hilawiga an imo pag-ilob hin pamati han akon iginhihimangraw ha ngaran han Dyos.

³Dako an akon hibaro, gagamiton ko an akon hinsasabotan ha pagpamatuod nga matadong an Dyos nga Magburuhat ha akon.

⁴Waray bisan ano nga buwa han akon igyayakan ha imo; nakita ka ha imo atubangan in tinuod nga makinaadmananon nga tawo.

⁵Hin pagkagamhanan han Dyos! Diri hiya nagtatamay hin bisan hin-o; waray gud bisan ano nga diri niya hinsasabtan.

⁶Diri hiya natugot nga magpadayon kabuhi an mga makasasala, ngan dayuday niya gindudumara hin matadong an mga pobre.

⁷Ginpapanalipdan niya adton mga magtadong; iya tinutugotan hira hin paghadi sugad hin kahadian, ngan ginpapasidunggan hira ha kadayonan.

⁸Kundi kon kinadenahan in mga tawo, nga nag-aantos tungod han ira ginbuhat,

⁹ipinapakita ha ira han Dyos an ira mga sala ngan an ira pagkamapinahitas-on.

¹⁰Ginpapabati hira han iya pahimatngon nga kinahanglan bumaya hira han maraot.

¹¹Kon magsugot hira han Dyos ngan mag-alagad ha iya, mag-uokoy hira ha kalinaw ngan kahimyangan ha bug-os nira nga kinabuhi.

¹²Kon diri, diri hira masabot nga mapatay hira ngan matabok hira han sapa ngadto han kalibutan han mga patay.

¹³Nagpapadayon hin kasina adton mga diri nakilala hin diyos, ngan bisan kon ginkakastigo hira, diri hira nag-aampo hin pakibulig.

¹⁴Nagkakamatay hira nga mga batan-on pa, ngan ginugul-an hira tungod hin kinabuhi nga makaarawod.

¹⁵Kundi gintututdoan han Dyos an mga tawo pinaagi hin pag-antos, ngan ginagamit niya an kasakitan hin pagpukrat han ira mga mata.

¹⁶Ginpagawas ka han Dyos tikang han kakurian, ngan tinugotan ka hin pagpahimulos hin kahimyangan, gintambakan hin pagkaon an imo lamesa.

¹⁷Kundi yana kinakastigo ka sumala han angay ha imo.

¹⁸Paghinay nga diri ka paglimbongan hin mga hukip, o diri ka sumimang han matadong nga dalan tungod han imo bahandi.

¹⁹Diri makakaupay ha imo an pagtawag hin pakibulig; diri makakabulig ha imo yana an bug-os mo nga kusog.

²⁰Ayaw pag-ungara nga umabot an kagab-ihon, an panahon nga maaanaw an kanasoran.

²¹Paghirot nga diri ka madara han maraot; tinagan ka hin pag-antos basi diri mahingadto ka ha karat-an.

²²Hinumdomi an pagkadako han gahom han Dyos; amo hiya an gidadakoi nga magturutdo han ngatanan.

²³Waray makakagtutdo han Dyos kon ano an iya pagbubuhaton, o makakagsumbong ha iya tungod hin maraot nga iya ginbuhat.

²⁴Dayuday hiya gindadayaw tungod han iya ginbubuhat; kinahanglan pagdayawon mo liwat hiya.

²⁵Hinkit-an han ngatanan an iya ginbuhat; kundi makita la kita hini ha tay-aw.[64]

²⁶Diri gud kita makakatugkad han iya pagkadako, o makakaihap han kadamo han iya mga katuigan.

²⁷An Dyos amo an nakuha hin tubig tikang han tuna ngan hinihimo ini nga uran.

²⁸Pinatuturo niya an uran tikang han mga dampog, ngan nabunok ini para han ngatanan nga mga tawo.

²⁹Waray maaram kon inuunan-o an pag-anod-anod han mga dampog, o an pagdinagurob han dalugdog nga nakakaluob han langit nga inuokyan han Dyos.

³⁰Pinapaidlap niya an kikidlat ha bug-os nga kalangitan, kundi nagpapabilin nga masirom an mga kahiladman han dagat.

³¹Amo ini an paagi han iya pagpakaon[65] han mga tawo, ngan paghatag hin hura nga pagkaon.

³²Kinakaptan niya an kikidlat, ngan sinusugo ini nga maigo an iya ginpupunting.

³³Nagpapahibaro an dalugdog han tiarabot nga bagyo, ngan maaram an kabakahan nga tiarabot an bagyo.