Read Waray Samarenyo Meaning Based Job 37 Bible Online

Job 37 - Waray Samarenyo Meaning Based bible

Job 37

¹An bagyo nakakapakusog han putok han akon kasingkasing.

²Pamati, kamo ngatanan, han tingog han Dyos, han dalugdog nga tikang han iya baba.

³Pinapaidlap niya an kikidlat nga natarap han langit; tikang ha usa nga sidsid han tuna ngadto ha luyo.

⁴Niyan hinbabatian an aningal han iya tingog, an makusog nga hugan-ob hin dalugdog, samtang nag-iiroidlap an kikidlat.

⁵Ha pagsugo han Dyos nahinanabo in makatitingala nga mga butang, urosahon nga mga butang nga makuri naton hisabutan.

⁶Sinusugo niya an yelo nga mahulog ha tuna, ngan nagpapadara hiya hin makusog nga uran.

⁷Ginpapaukoy niya an trabaho han mga tawo; iya pinapakita hira han iya mahihimo.[66]

⁸Napakadto han ira mga luoban an ihalas nga kamanampan.

⁹Tikang ha timogan an alipuros, ngan tikang ha amihanan an makalilisang nga kamahagkot.

¹⁰Nakakabagtik han katubigan an ginhawa han Dyos, ngan nahihimo ini nga bug-os nga yelo.

¹¹Nag-iidlap an kikidlat[67] tikang han mga dampog,

¹²samtang nag-aanod-anod an mga dampog ha pagbuot han Dyos. Gintutuman an ngatanan nga pinapagbuhat han Dyos ha ira, ha ngatanan nga dapit ha bug-os nga kalibutan.

¹³Pinapadara han Dyos an uran hin pagtubig han tuna; mahihimo ipadara ini niya hin pagkastigo hin mga tawo, o pagpakita ha ira han iya paghigugma.

¹⁴Hunong hin madaliay, Job, ngan pamati; pagpainoinoha an urosahon nga mga butang nga binubuhat han Dyos.

¹⁵Maaram ka ba kon inuunan-o han Dyos hin pagsugo basi makaidlap an kikidlat tikang han mga dampog?

¹⁶Maaram ka ba kon inuunan-o han mga dampog basi hira maglutawlutaw didto ha langit, nga buhat han kahiburongan nga gahom han Dyos?

¹⁷Job diri ka makakasabot hini, mag-aantos ka la han kapaso kon manggutak an tuna hin pagmara tungod han hangin nga timog.

¹⁸Makakabulig ka ba han Dyos hin pagbitad han langit ngan hin pagpatig-a hini sugad hin pinainggat nga metal?

¹⁹Tutdoi kami han amon igsisiring ha Dyos; waray sulod an amon mga hunahuna; waray gud namon sadang igyakan.

²⁰Diri ako maghahangyo hin pakighimangraw han Dyos; kay ano nga tatagan ko hiya hin higayon hin pagpuo ha akon?

²¹Ngan yana mabislaw an kapawa didto ha langit, mapawa hin duro nga makuri ini mabuslong; ngan ginhawanan han hangin an langit.

²²Hinkit-an didto ha amihanan in bulawanon nga sulhog, ngan nakapuno ha aton an makaaramdok nga himaya han Dyos.

²³Gamhanan kaupay an Dyos nga makuri kita makahirani ha iya; matadong hiya ngan waray niya pinalabi dida han iya mga pagdumara han mga tawo.

²⁴Sanglit diri urosahon nga may-ada kaamdok ha iya an ngatanan, ngan ginpapasibay-an niya adton mga napaka makinaadmananon.