Read Waray Samarenyo Meaning Based Job 38 Bible Online

Job 38 - Waray Samarenyo Meaning Based bible

Job 38

¹Niyan tikang han alipuros naghimangraw an GINOO kan Job.

²Baga hin-o ka nga nasuson han akon kinaadman pinaagi han imo tapang ngan waray hinungdan nga mga pulong?

³Tindog hin maupay ngan pagpakalalake ngan batona an akon mga ipapakiana ha imo.

⁴Nakadto ka ba han paghimoa ko han kalibutan? Kon maaram ka gudman, sumati daw ako mahitungod hini.

⁵Hin-o an naglarang han kadako han kalibutan? Hin-o an nagsukol han kahiluag hini? Maaram ka ba han ngatanan nga mga baton?

⁶Ano an tinutungtongan han mga harigi[68] nga nahawid han tuna? Hin-o an nagbutang han patukoranan han kalibutan?

⁷Dida han kaagahon hito nga adlaw nagdurungan pagkanta an kabiton-an, ngan ginmoliat hin kalipay an langitnon nga mga binuhat.[69]

⁸Hin-o an nagsada han mga ganghaan ha pagpugong han dagat[70] han iya bungkalas nga pag-awas tikang han kahiladman han tuna?

⁹Amo ako an nagpandong han dagat pinaagi hin mga dampog, ngan ginlukop ko ini hin kasisidman.

¹⁰Nagbutang ako hin pag-ultan han dagat ngan ginsagpo ko ini ha luyo basi diri makalapwas.

¹¹Ginsiring ko ini, “Tubtob ka la dinhe ngan ayaw na pagtipaunhan! Dinhe la matubtob an imo mga dagko nga balod.”

¹²Job, sulod han bug-os mo nga kinabuhi nagsugo ka na ba hin pagpasirang han adlaw?

¹³Nagsugo ka na ba han kaagahon nga lub-on niya hin kapawa an tuna ngan kapawaan an mga magraot basi mahadlok ngan gumawas ha ira mga taragoan?

¹⁴Tungod han pagsirang han adlaw napapawaan an kapungtoran ngan mga kahamub-an sugad han mga piniloan nga sidsid hin usa nga panapton, nga sugad ka dayag han lutop hin silyo dida hin lapok.

¹⁵Masilaw hin duro para han mga magraot an kapawa han adlaw, ngan naghihialang hira hin panlupig hin mga tawo.

¹⁶Nahingadto ka na ba han mga burabod, didto han mga kahiladman han dagat? Nakaglakat ka na ba didto ha salad han kalalawdan?

¹⁷May-ada na ba nagpakita ha imo han mga ganghaan nga nagbabantay han masirom nga kalibutan han mga patay?

¹⁸May-ada mo ba nahuhunahuna kon matiunan-o kadako an kalibutan? Batona ako kon maaram ka.

¹⁹Maaram ka ba kon diin tikang an kapawa, o kon ano an surok han kasisidman?

²⁰Makagbuot ka ba ha ira kon ano kahirayo an ira kakadtoan, o makapabalik ka ba ha ira?

²¹Maaram ako nga makakahimo ka, kay lagas ka na man hin duro, ngan nakadto ka ngani han paghimoa han kalibutan!

²²Nakaduaw ka na ba han hirimosan nga mga kwarto nga akon ginbutangan han mga yelo?

²³Gin-aandam ko ini para hin mga panahon hin kakurian; para hin mga adlaw hin pakig-away ug gubat.

²⁴Nahingadto ka na ba han dapit nga sinisirangan han adlaw, o han dapit diin natikang hin paghuyop an hangin nga kabunghan?

²⁵Hin-o an nag-ukab hin dalan para han uran, ngan naghawan han dalan para han makusog nga uranos?

²⁶Hin-o an nagpapauran didto han dapit nga waray naukoy na tawo?

²⁷Hin-o an nagpapatubig han mamara ngan bangkil nga tuna, basi tumurok an kabanwaan?

²⁸May-ada ba amay an uran o an tun-og?

²⁹Hin-o an iroy han mga yelo,

³⁰nga nakakapabagtik han katubigan ug han dagat sugad hin bato?

³¹Makakagbutok ka ba han Pleyades o makakaghubad han mga higot han Orion?

³²Makakagtutdo ka ba han mga bitoon ha kada panahon, ngan makakagtugway han Dako ngan han Gutiay nga Kabo nga kabiton-an?

³³Maaram ka ba han mga balaod nga nagdudumara han kalangitan, ngan makakahimo ka ba hin paggamit hini para ha tuna?

³⁴Makakagoliat ka ba hin pagsugo han mga dampog, nga paghumogon ka nira hin uran?

³⁵Ngan kon sugoon mo an kikidlat hin pag-idlap, makada ba ini ha imo nga masiring, “Aadi ako ha pag-alagad ha imo”?

³⁶Hin-o an nagsusumat han tamsi nga ibis[71] nga mabaha an Nilo, o hin-o an nagsusumat han sunoy nga maabot na an uran?[72]

³⁷Hin-o an makinaadmananon nga makakaihap han mga dampog, ngan makakagpakiling han mga dampog basi makauran,

³⁸uran nga nakakapatig-a basi magburubuk-ol an mga tapotapo?

³⁹Nakakaagi ka ba hin pagkaon para han mga liyon, ngan binubusog mo ba in ginugutom nga nati nga mga liyon,

⁴⁰kon natago ini didto han mga lungib, o nagama didto han ira nga luoban?

⁴¹Hin-o man an nagtutubong han mga uwak kon nagsusudoysudoy ini nga ginugutom, kon nangangaro ha akon hin pagkaon an ira mga piso?