Read Waray Samarenyo Meaning Based Job 39 Bible Online

Job 39 - Waray Samarenyo Meaning Based bible

Job 39

¹Maaram ka ba han takna nga igin-aanak han mga kanding ha bukid? Nakakita ka na ba hin nag-aanak nga ihalas nga bugsok?

²Maaram ka ba han kaiha han ira pagburod? Maaram ka ba han panahon han ira pag-anak?

³Maaram ka ba kon san-o hira maluob hin pag-anak?

⁴Didto han kagurangan nagmamakusog an mga nati; nabaya ini ngan diri na nabalik.

⁵Hin-o an naghatag han ihalas nga mga asno hin layaw nga kinabuhi? Hin-o an nagbuhi ngan nagpalayaw ha ira?

⁶Iginhatag ko an kamingawan nga ira urokyan, ngan ginpaukoy ini didto han kapatagan nga maasin.

⁷Napahirayo hira han maaringasa nga mga syudad, ngan waray makakagpaanad ngan makakagpirit ha ira hin pagbuhat.

⁸An kabukiran amo an mga toril nga ira pananabsaban, diin nangingita hira hin bisan ano nga lapyo nga banwa nga sadang makaon.

⁹Magtratrabaho ba para ha imo in simaron nga baka? Naruruyag ba ini hin pagluob didto han imo kamalig kon gab-i na?

¹⁰Mahihigtan mo ba ini hin pisi ngan makakapaarado ka ba ha iya? O magagamit mo ba ini hin pagpakaros han imo kaumhan?

¹¹Makakatapod ka ba han iya kakusgan, basi buhaton niya an imo mabug-at nga trabaho?

¹²Naglalaom ka ba nga makakagamit ka ha iya hin paghakot han imo inani, ngan pagdara han giniok ngadto han imo kamalig?

¹³Hinkamalaksi pumalapaka an mga pako hin duong nga tamsi! Kundi waray duong nga makakalupad sugad hin talabong.[73]

¹⁴Binabayaan han duong an iya mga bunay dida ha tuna, basi ini pagpasoan han alisngaw han tuna.

¹⁵Diri ini maaram nga bangin tamakan an iya mga bunay o buongon hin ihalas nga mananap.

¹⁶Sugadsugad nga diri iya an mga bunay, ngan diri ini nababaraka nga nakarag la an iya mga pagkabudlay.

¹⁷Amo ako an naghimo ha iya nga lurong ngan waray ko tagi hiya hin kinaadman.

¹⁸Kundi kon natikang na hiya hin pagdalagan,[74] gintataw-an la niya an bisan ano nga kabayo ngan sumarakay.

¹⁹Ikaw ba, Job, an naghatag hin kusog han mga kabayo, ngan naghatag ha ira han hilawig nga mga bungday?

²⁰Ginpalukso mo ba ini sugad hin mga duron, ngan ginhadlok mo an mga tawo pinaagi han ira hirihiri?

²¹Ginkokotkot nira an tuna didto han kahamub-an; nadasmag hira ngadto ha pag-awayan ha bug-os nira nga kusog.

²²Diri ini maaram kon ano an kahadlok, ngan waray espada nga nakakapaisol ha ira.

²³An mga hinganiban nga gindadara han mga nangangabayo ha ira nangangaradol ngan nag-iidlap.

²⁴Tungod hin kasindak nabungkalas an kakabayohan; diri gud hira nahahawiran kon magpatunog na han trompeta.

²⁵Naghihirihiri ini ha kada pagtutunog han trompeta; nakakabaho ini hin away nga hirayo pa, ngan nakakabati hira han goliat kon nasugo an mga opisyal.

²⁶Ikaw ba an nagtutdo han banog hin paglupad? kon binubuklad tipatimogan an iya mga pako?

²⁷Nahulat ba han imo sugo in usa nga agila hin paghimo han salag didto ha pungkay han kabukiran?

²⁸Nagsasalag hiya didto han gihahagtaasi nga mga bato, ngan hinihimo niya nga marig-on nga arayopan an mga tais nga talimpungayan.

²⁹Tikang didto nagbabantay hiya ha hirani ngan ha hirayo hin sadang niya patayon ngan kaonon.

³⁰Maglulupadlupad an mga agila harani han patay nga mga lawas, ngan nainom han dugo an piso pa nga mga agila.