Read Waray Samarenyo Meaning Based Job 4 Bible Online

Job 4 - Waray Samarenyo Meaning Based bible

Job 4

¹Job, diri ba makakasamok ha imo kon maghimangraw ako? Diri na gud ako makakahimo hin paghilom han akon binabati ha dughan.

³Gintutdoan mo in damo nga mga tawo, ngan ginpakusog mo in magluya nga mga kamot.

⁴Han paghipakdol han maluya ngan binubutlaw, gindasig mo hiya hin pagtindog pinaagi han imo mga pulong.

⁵Yana ikaw na an aada ha kakurian, ngan magkukuri ka kon uunanhon mo hin pagkarawat hini ngatanan.

⁶Nagsingba ka han Dyos ngan waray ikakasuson han imo kinabuhi; sanglit angay ka tumapod ngan lumaom.

⁷Yana panhunahuna daw! Pagngaran daw hin usa nga hinabo diin nahingadto hin karat-an in usa ka tawo nga matadong.

⁸Hinkit-an ko in mga tawo nga nag-arado hin kanan karat-an mga uma, ngan kamaraogdaog an gintanom sugad hin binhe; yana an ira naani amo an kamaraogdaog ngan karat-an.

⁹Sugad hin bagyo ginpukan hira han Dyos tungod han iya kasina.

¹⁰Nangurob ngan nauwang an mga magraogdaog sugad hin mga liyon, kundi pinapamingaw hira han Dyos ngan ginrurumok an ira mga ngipon.

¹¹Sugad hin mga liyon nga waray gud nadadakop ngan nakakaon, napatay hira ngan nagsasarang an ngatanan nira nga mga anak.

¹²Makausa inmabot hin hilom in usa nga mensahe, duro hin kahilom nga makuri ngani ako makabati.

¹³Sugad hin ngarat ginsamok an akon pagkaturog.

¹⁴Nangurog ako ngan nahadlok; nangurog hin kahadlok an bug-os ko nga lawas.

¹⁵Sinmaping ha akon bayhon in mahinay nga harupoy, ngan namarat hin kahadlok an barahibo han akon panit.

¹⁶Hinkit-an ko in natindog didto; tinutokan ko ini, kundi waray ako pakasabot kon ano adto. Niyan hinbatian ko in tingog ha butnga han kamingaw:

¹⁷“May-ada ba matadong nga tawo ha atubangan han[7] Dyos, o may-ada ba putli nga tawo ha atubangan han[8] iya Magburuhat?

¹⁸Diri an Dyos nasarig han iya langitnon nga mga surugoon; nakakaagi hiya hin sayop bisan han iya mga anghel.

¹⁹Naghuhunahuna ka ba nga masarig hiya hin usa han iya ginbuhat tikang ha tuna, hin usa ka butang nga tapotapo nga mahimo koromsom sugad hin tangkob?

²⁰Bangin ha aga buhi pa in usa ka tawo, kundi bangin diri ngani hisabotan nga patay na hiya nga diri pa naabot an kagab-ihon.

²¹Kukuhaon an ngatanan nga iya mga butang; napatay hiya, kulang la gihapon hin kinaadman.”