Read Waray Samarenyo Meaning Based Job 42 Bible Online

Job 42 - Waray Samarenyo Meaning Based bible

Job 42

¹Niyan binmaton han GINOO hi Job.

²Maaram ako, GINOO, nga labi ka hin kagamhanan; nga makakahimo ka han ngatanan nga imo karuyag.

³Napakiana ka kon ano nga sinususnan ko an imo kinaadman, nga usa man la ako nga tawo nga waray hibaro. Naghimangraw ako hiunong hin mga butang nga waray nakon hisabti, hiunong hin mga urosahon nga makuri ko hin duro matukib.

⁴Ginsiring mo ako nga pamatian ta ikaw samtang naghihimangraw ka, ngan pagbaton han imo mga pakiana.

⁵Hadto anay hinbaroan ko la an iginsumat ha akon han iba, kundi yana hinkit-an ko na ikaw han akon kalugaringon nga mga mata.

⁶Sanglit naaawod ako han ngatanan nga akon iginyakan, ngan nagbabasol ako nga nahigda ha tapotapo ngan ha mga agbon.

⁷Katapos han GINOO paghimangraw kan Job, ginsiring han GINOO hi Elipas, “Nasisina ako ha imo ngan han imo duha nga kasangkayan, kay waray kamo maghimangraw han kamatuoran hiunong ha akon, sugad han ginbuhat ni Job nga akon surugoon.

⁸Yana pagdara ngadto kan Job hin pito nga mga todo nga baka ngan pito nga mga karnero nga lalaki, ngan ighalad ini sugad nga mga halad nga tinubod para ha iyo. Mag-aampo hi Job para ha iyo, ngan pamamatian ko an iya pag-ampo, ngan diri ko kamo pagpapakaalohan sugad han angay ha iyo. Waray kamo maghimangraw han kamatuoran hiunong ha akon sugad han iya ginbuhat.”

⁹Gintuman nira Elipas, Bildad, ug Sopar an iginpabuhat ha ira han GINOO, ngan ginbaton han GINOO an pag-ampo ni Job.

¹⁰Niyan katapos ni Job pag-ampo para han iya tulo nga kasangkayan, nagmainuswagon na liwat hiya ngan gintagan hiya han GINOO hin doble pa kay han iya gintag-iya hadto anay.

¹¹Dinmuaw kan Job an ngatanan niya nga kabugtoan nga kalalaken-an ug kababayen-an ngan an iya hadto anay kasangkayan ngan nakigkombite ha iya didto han iya balay. Ginpakita nira an ira pagpaid ngan ginliaw hiya tungod han ngatanan nga kakurian nga ginhatag ha iya han GINOO. An kada usa ha ira maghatag ha iya hin kwarta ngan hin bulawan nga singsing.

¹²Ginpakaupay han GINOO an kataposan nga mga tuig ni Job labaw pa han pagpakaupay niya han una. Nagtag-iya pa hi Job hin 14,000 nga mga karnero, 6,000 nga mga kamelyo, 2,000 nga mga baka, ngan 1,000 nga mga asno.

¹³Nagin amay pa hiya hin pito nga mga anak nga kalalaken-an ngan tulo nga kababayen-an.

¹⁴Ginngaranan niya kan Jemima an suhag nga babaye, Kesiya an ikaduha, ngan Keren-hapuc an puto.[83]

¹⁵Waray na iba nga kababayen-an ha bug-os nga kalibutan nga sugad kamaghusay han mga anak nga kababayen-an ni Job. Gintagan hira han ira amay hin bahin han panurundon kaupod han ira kabugtoan nga kalalaken-an.

¹⁶Katapos hini nakaabot pa hi Job hin panuigon nga 140, igo nga kaiha hin pakakita han iya mga apo, ngan mga apo han iya mga apo.

¹⁷Ngan namatay hiya nga lagas na gud hin duro.