Read Waray Samarenyo Meaning Based Job 5 Bible Online

Job 5 - Waray Samarenyo Meaning Based bible

Job 5

¹Pagsangpit, Job. Tan-awa kon may nabaton ba. May-ada ba anghel nga sadang mo dangpan?

²Linurong ngan tinuyaw nga buhat an pagkinaguol kon haros ikamatay nga inupdan hin pagdumot.

³Kinmita ako hin mga lurong nga himyang an ira kahimtang, kundi ginmaldisyon ko dayon an ira mga panimalay.

⁴Mawawaray na gud kahimyangan an ira mga anak; waray natindog didto ha hukmanan hin pagpanalipod ha ira.

⁵Kakaonon hin ginugutom nga mga tawo an mga abot han lurong— bisan pa an mga ginpugas dida han mga katungkan[9]— ngan maaawa han iya manggad an inuuhaw nga mga tawo.

⁶Diri natubo dida han tuna an karat-an, amo man gihapon an kakurian.

⁷Diri! Tawo an nagdadara hin kakurian ha iya la ngahaw, sugad gud nga nataprik tipaigbaw an mga sispas tikang hin kalayo.[10]

⁸Kon ako ha imo, madangop ako han Dyos, ngan itutubyan ko ha iya an akon kasugaran.

⁹Diri kita nakakasabot han dagko nga mga butang nga iya ginbubuhat, ngan waray pagkatapos an iya mga milagro.

¹⁰Pinauuranan niya an tuna ngan pinatutubigan an kaumhan.

¹¹Tinuod, an Dyos amo an nagpapabangon han mapinaubsanon, ngan naglilipay han ngatanan nga masulob-on.

¹²Ginpapakyas niya an larang han mga maglimbong, ngan ginbibitik an mga makinaadmananon, dida han ira kalugaringon nga mga paagi, basi diri hira magmainuswagon bisan ano an ira buhaton;

¹⁴bisan ha udto nangangapkap hira dida han kasisidman.

¹⁵Kundi tinatalwas han Dyos ha kamatayon an mga kablas,[11] tinatalwas niya an mga magpakalolooy hadton nagraraogdaog ha ira.

¹⁶Tinatagan niya hin paglaom an mga kablas ngan pinapamingaw niya an mga magraogdaog.

¹⁷Malipayon an tawo nga ginsasagdonan han Dyos! Ayaw kasina kon ginsasaway ka niya.

¹⁸Binubutok han Dyos an mga kasamdan nga hiya an tinikangan; iya kamot an nagsasamad ha imo, kundi iya liwat kamot an nagtatambal.

¹⁹Tatalwason ka niya tikang han karat-an ha takna ngatanan;

²⁰bubuhion ka niya ha panahon han katgutom, ngan ha panahon han araway igagawas ka niya ha kamatayon.

²¹Tatalwason ka han Dyos tikang han pagpakaraot; tatalwason ka niya kon umabot an pagkapukan.

²²Pagtataw-an mo la an panlupig ngan kagutom, ngan diri ka mahahadlok han ihalas nga kamanampan.

²³Diri na batoon an aradohon nga imo mga uma; diri ka na susulongon hin ihalas nga kamanampan.

²⁴Niyan mag-uokoy ka nga murayaw didto han imo tulda; kon tan-awon mo an imo mga karnero, hikikit-an mo nga harayo hira ha kataragman.

²⁵An imo mga anak magmamadamo sugad kadamo han mga dahon han kabanwaan han pasabsaban.

²⁶Sugad hin mga hinog nga trigo nga diri na maiha pag-anihon, mapatay ka nga lagas ka na ha panuigon.

²⁷Job, hinbaroan namon ini pinaagi hin maiha nga pag-aram. Matuod ini, sanglit karawata ini yana para han imo kalugaringon.