Read Waray Samarenyo Meaning Based Job 6 Bible Online

Job 6 - Waray Samarenyo Meaning Based bible

Job 6

¹Kon titimbangon la an akon mga kakurian ngan mga kabidoan,

³maburubug-at pa ini kay han mga baras han dagat, sanglit ayaw hipausa han akon inapiki nga mga pulong.

⁴Ginpana ako han Dyos nga Labi Kamakagarahum ngan nagsarang ha akon lawas an lara. Gin-andam na han Dyos an iya mga paghadlok ha akon.

⁵Malipay na an asno kon nananabsab hiya hin banwa, ngan mahilom la an baka kon nananabsab hin sakati.

⁶Kundi hin-o in gaganahan hin pagkaon hin matab-ang nga waray rasa nga pagkaon? Ano ngani an rasa han musagbusag hin bonay?

⁷Waray ako gana hin sugad nga mga pagkaon, ngan nakakapasakit[12] la ha akon an ngatanan nga akon kinakaon.

⁸Kay ano nga diri ihinahatag ha akon han Dyos an akon pinangangaro? Kay ano nga diri niya pinamamatian an akon pag-ampo?

⁹Kon tibwayon nala unta han Dyos hin pagpatay ha akon!

¹⁰Kon hibabaroan ko la nga tutud-on ini niya, malukso ako hin kalipay, bisan diunan-o kadako an akon kasakitan. Maaram ako nga baraan an Dyos; waray pa gud nakon supaka an iya mga sugo.

¹¹Ano pa nga kusog an akon igpapadayon hin kabuhi? Kay ano nga nabubuhi pa ako nga waray na man ako paglaom?

¹²Hinimo ba ako hin bato? Bronse ba an akon lawas?

¹³Waray ko na kusog hin pagtalwas ha akon ngahaw; waray ko na sadang dangpan hin pangaro hin bulig.

¹⁴Dida hin kakurian[13] nga sugad hini nagkikinahanglan ako hin maunungon nga kasangkayan— bisan kon iginsalikway ko an Dyos o waray.

¹⁵Kundi kamo nga akon kasangkayan, ginlilimbongan ako niyo sugad hin mga sapa nga nahubas kon waray uran.

¹⁶Puno hin mga yelo an mga sapa,

¹⁷kundi kon pinapasoan an mga yelo natutunaw ngan nahubas ngan nagmamara an mga sapa.

¹⁸Nawawara in mga naglalakaton ha ira pamiling hin tubig; nagsusudoysudoy ngan napatay hira didto ha kamingawan.

¹⁹Namimiling in mga naglalakaton nga tikang ha Seba ug Tema.

²⁰Kundi napatay an ira paglaom ha ligid hin magmara nga mga sapa.

²¹Para ha akon[14] sugad[15] kamo hito nga mga sapa, nakita kamo han akon kasugaran ngan naisol kamo hin kahadlok.

²²Ginhangyo ko ba kamo nga tagan ako niyo hin regalo, o maghukip kamo hin iba nga tawo para ha akon,

²³o magtalwas ha akon tikang hin kaaway o hin maraogdaog?

²⁴Hala, tutdoi ako; sumati ako han akon mga sayop. Mahilom ngan mamamati ako ha iyo.

²⁵Nakakakabig in tangkod nga mga pulong, kundi nagyiyinakan kamo nga waray mga buot.

²⁶Naghuhunahuna kamo nga waray hinungdan an akon ginyiyinakan; kay ano man nga binabaton niyo an akon mga pulong hin pagturaw?

²⁷Bisan an mga ilo nga oripon iyo ginriripa, bisan an iyo suok nga kasangkayan iyo sinisingabot basi magriko la kamo!

²⁸Tutoki ako niyo. Diri ako magbubuwa.

²⁹Labis na an iyo ginbuhat. Undang na kamo hin pagbuhat han diri matadong. Ayaw ako niyo paghukmi kay matadong ako.

³⁰Kundi naghuhunahuna kamo nga nagbibinuwa la ako— an iyo hunahuna nga diri ako makakasabot han kalainan han matadong ngan han sayop.