Read Waray Samarenyo Meaning Based Job 7 Bible Online

Job 7 - Waray Samarenyo Meaning Based bible

Job 7

¹An kinabuhi han tawo sugad hin pinirit nga pag-alagad hin kasondalohan, sugad hin kinabuhi hin makuri ngan kinamot nga trabaho,

²sugad hin oripon nga nangangandoy hin mahagkot nga lindong; sugad hin magburudlay nga naghuhulat han iya suhol.

³Sunodsunod an mga bulan nga waray na ako sadang kabuhian; sunodsunod an kagab-ihon nga nahatag la ha akon hin kabidoan.

⁴Kon nahigda ako hin pagkaturog, kamaiha matapos an usa ka oras; mag-aga la an akon lurulimbag ngan karuyag ko na la nga maaga na.

⁵Luob hin mga ulod an akon lawas; putos ini hin mga nuka; nagnanana an akon mga kaduntan.

⁶Nalabay hin waray paglaom an akon mga adlaw, nalabay nga malarulaksi pa kay hin lansadira[16] hin parahablon.

⁷Hinumdomi, O Dyos, nga usa la nga ginhawa an akon kinabuhi; natapos na an akon kalipayan.

⁸Yana nakita ka ha akon, kundi tikang yana diri ka na gud makita ha akon. Kon mamiling ka ha akon, nawawara ako.

⁹Sugad hin dampog nga napapas ngan nawawara, napatay an tawo ngan diri na gud nabalik; hinngangalimtan hiya han ngatanan nga kinmilala ha iya.

¹¹Diri! Diri ako makakahilom! Nasisina ngan napupungot gud ako. Kinahanglan magyakan ako.

¹²Kay ano nga ginpapabantayan mo ako? Naghuhunahuna ka ba nga higante ako nga mananap ha dagat?[17]

¹³Nahigda ako ngan karuyag ko hin pagpahuway; nangingita ako hin makakapagaan han akon kasakitan.

¹⁴Kundi ikaw—ginhahadlok mo ako hin mga inop; pinapadad-an mo ako hin mga panan-awon nga magpakaharadlok

¹⁵tungod hini, gabay na la ako pitlokon basi mamatay, kay nga mabuhi dida hini nga makalolooy nga lawas.

¹⁶Diri na ako makakaantos. Ginugul-an na ako hini nga kinabuhi. Pasagdi nala ako. Waray na hinungdan an akon kinabuhi.

¹⁷Kay ano nga importante gud ha imo an tawo? Kay ano nga nanginginano ka man han iya ginbubuhat?

¹⁸Gin-uusisa mo hiya ha kada aga ngan ginsasarihan mo hiya ha kada gutlo.

¹⁹Diri ka ba makakalingiw anay ngada nga matulon ko an akon laway?

²⁰Nadadaot ka ba han akon sala, ikaw nga nagpriso ha akon? Kay ano nga ginhimo mo ako nga punta blanko han imo mga pagponting? Mabug-at ba gud ako nga pinas-an mo?

²¹Diri ka ba makakapasaylo han akon sala? Diri ka ba makakapasaylo han sayop nga akon ginbuhat? Diri maiha makadto na ako han akon lubnganan, ngan kon mamiling ka ha akon, mawawara ako.