Read Waray Samarenyo Meaning Based Job 9 Bible Online

Job 9 - Waray Samarenyo Meaning Based bible

Job 9

¹Tinuod, hinbatian ko na ito ngatanan hadto pa. Kundi uunanhon hin pakadaog hin usa ka tawo han iya sumbong kontra han Dyos?

³Uunanhon hin usa ka tawo hin pakiglantugi ha iya? Han yinukot nga iya pakiana waray gud tawo nga makakabaton ha iya.[19]

⁴Makinaadmananon ngan gamhanan gud an Dyos; waray tawo nga makakaato ha iya.

⁵Binabalhin niya an kabukiran hin diri hiya nagpapahibaro, ngan tungod han iya kasina binubungkag ini niya.

⁶Nagpapadara hin mga linog an Dyos ngan binabay-og an tuna; inuuy-og niya an mga harigi nga tinutungtongan han tuna.

⁷Makakagpugong hiya han pagsirang han adlaw ngan hin pagsanag han mga bitoon ha gab-i.

⁸Waray may binmulig han Dyos hin pagbitad han kalangitan, o hin pagtamak han taludtod han higante nga mananap ha dagat.[20]

⁹Gintaod han Dyos didto ha langit an mga bitoon—an Kabo, an Orion, an Pleyades, ngan an mga bitoon han timogan.

¹⁰Diri kita nakakasabot han dagko nga mga butang nga iya ginbubuhat, ngan waray pagkatapos an iya mga milagro.

¹¹Nalabay an Dyos, kundi diri ako nakita ha iya.

¹²Nakuha hiya han iya kinaruruyag, ngan waray nakakapugong ha iya; waray nangangahas hin pagpakiana ha iya, “Ano an imo ginbubuhat?”

¹³Dayuday an kasina han Dyos. Gindugmok niya an iya mga kaaway, nga binmulig kan Rahab[21] nga higante nga mananap ha dagat hin pag-ato ha iya.

¹⁴Sanglit ano man nga mga pulong an akon igbabaton han Dyos?

¹⁵Bisan kon waray ako sala, an akon la mahihimo amo an pakimalooy han Dyos nga akon maghurukom.

¹⁶Kundi bisan pa ngani kon tugotan ako niya hin pagyakan, diri ako makakatuo nga mamamati hiya ha akon.

¹⁷Ginpapadara niya in mga bagyo hin paghampak ngan pagsamad ha akon hin waray gud ano man nga hinungdan.

¹⁸Diri ngani ako niya pinagiginhawa; ginpuno niya hin kapaitan an akon kinabuhi.

¹⁹Sasarihan ko ba hin paggamit hin kusog? Hin kusog kontra han Dyos? Isusumbong ko ba hiya ha hukmanan? Hin-o man an magpapakadto ha iya?[22]

²⁰Waray ko sala ngan matinumanon ako, kundi daw salaan an akon mga pulong, ngan daw hinuhukman ako han ngatanan nga akon ginyayakan.

²¹Waray ako sala, kundi saho ko man. Ginugul-an na ako hini nga kinabuhi. Waray nagud kapulsanan; mawaray sala o salaan, pupuohon kita han Dyos.

²³Kon napatay hin tigda in usa ka tawo nga waray sala, nakakatawo an Dyos.

²⁴Iginhatag han Dyos an kalibutan ngadto han mga magraot. Ginbuta niya an ngatanan nga mga maghurukom. Ngan kon waray magbuhat hini an Dyos, hin-o pa man?

²⁵Madagmit an paglabay han akon mga adlaw, waray gud usa hini nga maupay.

²⁶Nalabay an akon kinabuhi sugad han labi kamatulin nga sakayan, sugad kalaksi hin agila nga nadagit hin koneho.

²⁷Kon humiyom ako ngan magtinguha hin paglimot han akon mga mag-ol-ol, nabalik hin paghadlok ha akon an ngatanan ko nga pag-antos; maaram ako nga ginsasala ako han Dyos.

²⁹Tungod nga ginsasala man ako han Dyos, kay ano man nga mapaalantad man ako?

³⁰Waray sabon nga makakahugas han akon mga sala.

³¹Iginhahapil ako han Dyos ngadto hin luong hin mga hugaw, ngan bisan an akon panapton, naaawod ha akon.

³²Kon tawo la an Dyos, makakabaton ako ha iya; makakakadto kami ha hukmanan hin pagtuhay han amon kalipongan.

³³Kundi waray gud makakagtuhay ha amon— waray makakaghukom han Dyos ngan ha akon.

³⁴Hunong na gad hin pagkastigo ha akon, O Dyos! Ayaw na gad ako paghadloka!

³⁵Diri ako nahahadlok. Magyayakan ako, kay maaram ako han akon binabati ha akon kalugaringon nga kasingkasing.