Read Waray Samarenyo Meaning Based Mga Salmo 103 Bible Online

Mga Salmo 103 - Waray Samarenyo Meaning Based bible

Mga Salmo 103

¹[183] An GINOO, kalag ko, imo pagdayawon, an iya baraan nga ngaran akon pagdayegon.

²An GINOO, kalag ko, imo pagdayawon, an iya pagkamaupay diri mo limoton.

³Napasaylo hiya han akon mga sala, an akon mga sakit gintatambal niya.

⁴Pinapahirayo ako niya ha lubnganan, gugma ug kalooy ako niya tinatagan.

⁵An akon kinabuhi[184] iya ginpupun-an, han iya mga mag-upay nga butang. Basi ako magpadayon hin kabata ug kakusog, sugad hin kusgan ug malaksi nga banog.

⁶GINOO, naugop ka han mga ginraraogdaog, ngan tinatagan mo hira han ira katungod.

⁷Mga larang niya hi Moises ginsumatan, an Israel iya ginpakita han iya kagamhanan.

⁸An GINOO maloloy-on ug mahigugmaon, mahinay masina, may gugma nga dayon.

⁹Diri hiya kanunay nagbibinusa, diri kadayunan an iya kasina.

¹⁰Diri kita niya ginsisirotan, sumala ha igo ha aton ug kaangayan. Diri man kita niya ginbabalosan, sumala han aton mga kasal-anan.

¹¹Sugad kahitaas hadton kalangitan, ha igbaw han tuna hinin kalibutan; amon man kadako an iya paghigugma, hadton may pagtahod, kahadlok ha iya.

¹²Sugad nga hirayo adton sinirangan, han namamarapara nga katundan; amo man an kahirayo han iya pagkuha, tikang ha aton han aton mga sala.

¹³Sugad nga an amay han iya anak maloloy-on, amo man an GINOO hadton ha iya mahadlokon.

¹⁴Maaram hiya kon ano an iya ginhimo ha aton, nga tapotapo kita, hiya nanunumdom.

¹⁵An kinabuhi han tawo sugad la hin banwa, bukad ha kapatagan nga namumukad na.

¹⁶Paghuypa han hangin, nawawara dayon, ngan diri na gud ini hira kikitaon.

¹⁷Kundi an gugma han GINOO nagpapadayon, han mga tawo nga ha iya mahadlokon; ngan magpapadayon an iya kaupayan, ngadto han ngatanan nga mga katulinan,

¹⁸ngadto han nagtutuman han ginsaaran, ngan hadton nasugot han iya kasugoanan.

¹⁹Gintindog ha langit an trono han GINOO, hiya an hadi han ngatanan nga hinimo.

²⁰Kusgan nga mga anghel, dayawa an GINOO, namamati, natuman han iya mga sugo.

²¹Dayawa an GINOO, kamo ngatanan, mga kagamhanan ha kalangitan; hi kamo nga iya mga surugoon, nga nagtutuman han iya kaburot-on.

²²Ngatanan kamo, an GINOO dayawa, nga iya ginbuhat ug iya gintuha; bisan diin nga dapit nga paghadian niya, kalag ko, an imo GINOO pagdayawa.