Read Waray Samarenyo Meaning Based Mga Salmo 104 Bible Online

Mga Salmo 104 - Waray Samarenyo Meaning Based bible

Mga Salmo 104

¹Pagdayawa an GINOO, O kalag ko! O GINOO nga akon Dyos pagkadako! Kaharangdon, kadungganan an bado mo,

²naputos ka ngahaw han kapawa nimo. Daw tulda ginbitad mo an kalangitan,

³ngan imo gintindog an imo urokyan; didto ini ha igbaw han katubigan,[185] imo karuwahe mga kadampogan. Pako han hangin an imo ginlalaktan.

⁴Imo magsarangyaw adton kahanginan ngan an mga idlap han kakikidlatan, ginagamit nga mga surugoon man.

⁵Marig-on gud an imo pagpahimutang han tuna dit' han iya patukoranan. Diri ini mawawaring, mababantad,

⁶binawbawan ini hadton katubigan. Daw hin panapton adto nga katubigan, nga nagtahob bisan pa han kabukiran.

⁷Han pagsaway mo hadto nga kalalawdan, nanlikay gud dayon nanmalagiw gudman.

⁸Nagdagmit gad hira hin pagpahirayo, pagbati nira'n im' goliat nga sugo. Sulhog kabukiran nga't han kahamub-an, nga't han dapit nira nga im' gintalaan.

⁹Iginpahimutang mo an katutoban, nga diri gud nira nga paglalahosan. Basi diri nira na gud paglunopan an bug-os nga tuna hinin kalibutan.

¹⁰Im' paawas burabod ha kahamub-an, tubig nagsupatsupat han kabukiran.

¹¹Nagpainom ihalas nga kamanampan, bulong kauhaw han layaw kaasnohan.

¹²Nagsasalag, nag-aawit katamsihan di't han higrani nga mga kakahoyan.

¹³Tikang langit uran mo ha kabukiran, puno'n tuna han im' mga kaupayan.

¹⁴Imo ginpalangbo adton kabanwaan, para panabsaban hadton kahayopan; mga tanom hin paggamit han katawhan, maiya pagkaon tikang katunaan.

¹⁵Ngan basi makahimo hiya hin bino nga amo'n nakakapalaksi han tawo, lana hin olibo iya maglilipay, nahatag na iya'n kusog an tinapay.

¹⁶Adton mga sidro didto ha Libano, dayuday may uran nga tubig nga damo; amo ini an kahoy gud han GINOO, hiya an nagtanom, hiya'n nagpatubo.

¹⁷Nagsasalag didto adton katamsihan, adton mga talabong, ha kakahoyan.

¹⁸Higtaas nga bukid, an kakakandingan, mga umpas, han koneho taragoan.

¹⁹Tuha mo an bula, panahon tigaman, katunod han adlaw iya hinbaroan.

²⁰Himo mo an gab-i ngan ha kasisidman, nasudoy an ihalas nga kamanampan.

²¹Ngurob hin panganop mga nati liyon, pangita han hatag han Dyos nga pagkaon.

²²Pagpunias, paglamrag han kaadlawon, balik pagluob ha ira mga dugmon.

²³Niyan adton mga tawo man nabangon, pagbuhat han ira mga buruhaton; padayon an ira pagkinabudlayon, tubtob han pag-abot na han kagab-ihon.

²⁴O GINOO ka damo nga mga butang an im' ginhimo han imo kinaadman; ikaw an nagbuhat hini gud ngatanan, puno na han im' buhat an kalibutan.

²⁵Ada an kadagatan ngan kalalawdan, duro hin kadagko ngan kahagluag man; ada an di' maisip nga mga butang, an dagko ngan gudti nga im' binuhatan.

²⁶Ada paglalayag mga kabarkohan, ada pagmumulay dako nga Lebiatan; ito nga higante hiton kadagatan, nga imo man liwat ini binuhatan.[186]

²⁷Nasarig ha imo ini gud ngatanan, hin mga pagkaon, ira kinahanglan;

²⁸an imo ginhatag ira ginpupulsan, han imo pagkaon hira busog gudman.

²⁹Hadlok hira kon imo binabayaan, patay hira kon imo binabawian; han im' gininhawa patay kon kuhaan, ngan balik ha tuna diin hira tikang.

³⁰Kundi kon nahatag ka ngadto ha ira han im' gininhawa,[187] hira natutuha; hin bag-o nga kinabuhi nahatag ka ngadto ha kalibutan dinhe ha tuna.

³¹Magpabilin na unta ha kadayonan an himaya han Dyos, iya kagamhan! An GINOO unta magmalipayon man, tungod hadton iya mga binuhatan!

³²Kon iya tinatan-aw an kalibutan, nakurog dayon ha tuna an ngatanan; kon iya hinihikap an kabukiran, nauskok dayon an mga kaasohan.

³³Magkakanta ako ngadto ha GINOO ha bug-os gud hini nga kinabuhi ko; samtang buhi pa magkakanta gud ako, hin pagdayaw han Dyos nga akon GINOO.

³⁴Makalipay unta ha iya'n ak' kanta, kay ginlilipay man liwat ako niya.

³⁵Mapuo na unta dinhe hinin tuna an mga magraot ngan makasasala. Pagdayawa an GINOO, O kalag ko! Pagdayawa, pagdayawa an GINOO!