Read Waray Samarenyo Meaning Based Mga Salmo 106 Bible Online

Mga Salmo 106 - Waray Samarenyo Meaning Based bible

Mga Salmo 106

¹Dayawon an GINOO! Pagpasalamati liwat hiya niyo; kay tugob hiya hin kamaupay, kay dayon an iya gugma ug dayuday.

²Hin-o gud ha aton in makakagsumat, hadton iya gamhanan nga mga buhat? Hin-o gud ha aton in makakagpakita, hin igo, angay nga pagdayaw ha iya?

³Pagkapalaran han mga nagsusugot, hin pagtuman hadton iya mga balaod; ngan nagbubuhat hadton katadongan, ha gihapon ug ha takna gud ngatanan.

⁴Hinumdomi gad man ako, GINOO, kon natabang ka han imo mga tawo; ha imo mga pagbulig sakopa gad ako, kon an imo katawhan gintatalwas nimo.

⁵Pakitaa ako han pag-uswag han imo katawhan, ipaangbit ha akon kanan nasod kalipayan; basi magmalipay ngan magrayhak ako, kaupod han mga ginsakopan nimo.

⁶Nakasala kami ngan an amon ginikanan, kay ginbuhat namon in mga karat-an.

⁷Mga ginikanan namon ha Ehipto, waray makasabot han ginbuhat nimo. Mga urosahon nalimot na hira, han mga ginpakita nga gugma niya; han Makagarahum[190] sinmupil pa hira, didto han dagat nga gintabukan nira.

⁸Kundi iya gihapon hira gintalwas, sugad gud han iya ha ira ginluwas; basi ha ira hiya makagpakita, han dako nga pagkagamhanan niya.

⁹An Lusayon nga Dagat ginsugo niya, ngan hinmubas dayon ito ngan nagmara; ha iya katawhan hiya an nag-una, han pagtabok nira han salad nga mamara.

¹⁰Sanglit ginbawi na liwat hira niya, tikang hadton mga nagdumot ha ira; ngan iya man gihapon hira gintalwas, tikang han kaaway nira nga magpintas.

¹¹Ginlumsan han tubig an kaaway nira, waray nahibilin bisan gud la usa.

¹²Katawhan niya tinmuod han saad niya, ngan ha pagdayaw ha iya nagkaranta.

¹³Kundi madali la nira hingalimtan, an dagko niya nga mga binuhatan; waray na maghulat han iya paglarang, kundi nagbuhat han ira naruyagan.

¹⁴Nag-ungara hira didto ha kamingawan, ngan an Dyos ira gud ginsarihan.

¹⁵Sanglit an ira gin-aro, iya gintagan, kundi mangirhat nga peste iya ginparad-an.

¹⁶Didto inmawa kan Moises an katawhan, ngan kan Aaron nga kanan Dyos baraan.

¹⁷Binmuka an tuna, ginlam-oy hi Datan, ngan nahilubong an mga sakop ni Abiram.

¹⁸Kalayo linmusad ug hira nasuritan, an ngatanan nga mga ginsakopan; nasunog, naugtang hira ngatanan, an iya mga magraot nga katawhan.

¹⁹Ha Horeb naghimo hin nati nga bulawan, ngan ginsingba nira ini nga ladawan.

²⁰An kaanyag han Dyos ginbalyoan nira, ladawan hin hayop nga nakaon hin banwa.

²¹Nalimot hira han Dyos nga nagtalwas ha ira, ha Ehipto pinaagi han dagko nga buhat niya;

²²ha Lusayon nga Dagat ginbuhat niya, mga urosahon, makatitingala!

²³Sanglit, siring han Dyos, hira pagpupuohon, kon diri pa hi Moises, an iya surugoon; inmabtubang han Dyos basi hin pagpugong, han iya kapungot nga diri ipadayon.

²⁴Ngan dinmiri hira han maupay nga tuna, kay waray nira pagsarig han ginsaad niya.

²⁵Nagngurutob hira didto han ira tulda, an GINOO nagpakabungol la ha ira.

²⁶Sanglit iya hira ginpahimatngonan, papatayon hira didto ha kamingawan.

²⁷Ira katulinan in magpapatsarang, magkakamatay ha langyaw nga kanasoran.

²⁸Ngan an kanan Dyos katawhan tinmampo na, hin pagsingba kan Baal ha Peor nga tuna; han iginhahalad kinmaon pa hira, ngadto hadton patay nga kadiyosan nira.

²⁹Gin-aghat an kanan GINOO kasina, pinaagi hadton ginawian nira; ngan peste, malara ngan makalilisang, dida ha ira binmutho, nagsarang.

³⁰Ginkastigo ni Penihas adton mga salaan, tungod hini an peste inmundang.

³¹Tungod hini diri hiya hingangalimtan, ngan magpapadayon ha takna ngatanan.

³²Gin-urit an GINOO didto ha Meriba, ngan nabido hi Moises tungod ha ira.

³³Natagan hi Moises hin dako nga kabidoan, nga nagyinakan hin diri kaangayan.

³⁴Mga Hentil waray nira pamataya, sugad han ginsugo han GINOO ha ira.

³⁵Kundi lugod ha ira nakig-aragsawa, ngan nagsubad han mga ginawian nira.

³⁶Mga ladawan ginsingba han katawhan, natinikangan ini han ira kabungkagan.

³⁷Ira iginhalad an ira kabataan, ngadto han kadiyosan han Canaan.

³⁸Ginpamatay nira ini nga katawhan, ira mga anak, inosente pa man; tungod han pamatay nga makalilisang, an ira kalugaringon nga tuna nahugawan.

³⁹Nahugawan liwat an ira mga binuhatan, han pagsirbe han Dyos waray hira makagtuman.

⁴⁰Sanglit an GINOO duro hin kasina, iya ginsalikway an katawhan niya.

⁴¹Basi mabihag hira, iya hira ginpabay-an, han mga kaaway hira ginhadian.

⁴²Gintalumpigos hira han mga kaaway nira, ngan ginraogdaog ug gin-oripon pa.

⁴³Nakadamo hira han ira Dyos pagtalwasa, kundi an pag-ato asay an ginpili nira. Hira nagtikalodlod ha pakasala.

⁴⁴Kundi pinamatian han GINOO pa, an ira pagsangpit, ira pangaraba; ngan ginpanimangno an kakurian nira.

⁴⁵Iya gindumdom an ira ginkasarabotan, tungod han iya gugma, iya hira ginturosan.

⁴⁶Waray magdumot, kinalooyan hira, han nagbihag, ug nagbilanggo ha ira.

⁴⁷GINOO, amon Dyos, kami pagtalwasa, tikang han kanasoran kami tiroka; basi baraan mo nga ngaran amon pagdayawon, ngan pagpasalamatan ka namon nga malipayon.

⁴⁸An Dyos ha Israel, GINOO dayawon! Dayawon ta hiya yana ug ha gihapon; ngatanan nga tawo, “Amen” an igbaton, pagdayawon hiya nga GINOO naton!