Read Waray Samarenyo Meaning Based Mga Salmo 109 Bible Online

Mga Salmo 109 - Waray Samarenyo Meaning Based bible

Mga Salmo 109

¹[195] O Dyos, ikaw an gindadayaw nakon, an imo paghilom ayaw ipadayon!

²Ginsulong ako han magraot, buwaon, nga nagbibinuwa hiunong ha akon.

³Magpakaharadlok nga mga butang, an ira ha akon ginbubutangbutang;

⁴Ngan ira ako hin waray la hinungdan, ginpakaraot ha ira mga yakan.[196]

⁵Han maupay asay la ginbalos an maraot, han akon paghigugma, asay la an pagdumot.

⁶Han akon kaaway, an magraot an papaghukma, ngan usa han iya kaaway in magsumbong ha iya.

⁷Han sayop magtug-an kon paghukman na hiya, bisan an iya pag-ampo isipon nga sala.

⁸Iya kinabuhi matapus na unta, ngan an iya buhat iba an magdara.

⁹Magkaiilo unta an kabataan niya, ngan mabalo na an iya asawa.

¹⁰Makilimos unta an iya kabataan, ngan waray na balay nga ira olian. Paiwason[197] unta ini hira ngatanan, tikang han nagun-ob nga ira gin-ukyan.

¹¹Kuhaon unta an ngatanan nga iya mga butang, hadton nga tawo nga iya nautangan; ngan han mga langyaw hiya unta bawian, han ngatanan nga iya ginkabudlayan.

¹²Waray na unta pumaid ha iya bisan la usa, ngan manimangno han mga ilo niya.

¹³Mamatay unta an ngatanan niya mga katulinan, ngan an iya ngaran ira na hingalimtan.

¹⁴Hinaut unta nga han GINOO hinumdoman, an karat-an han iya mga ginikanan. Ngan hin pasaylo diri gud kahatagan, kanan iroy niya mga kasal-anan.

¹⁵Dayuday nga diri unta hingalimtan, han Ginoo an ira mga kasal-anan; kundi hira ngahaw an mga ginikanan, diri angay na hinumdoman.

¹⁶Waray hin kalooy ini nga tawo makahunahuna, kundi ginpakurian, ginpatay niya; an mga kablas, makalolooy ngan magluya.

¹⁷An panhimaraot iya naruyagan, an gaba ha iya unta umumban; dinmiri gud paghatag hin kaupayan, hin kaupayan liwat diri hiya tagan!

¹⁸Masayunay la niya an panhimaraot, sugad han iya bado hin pagsul-ot; sumalopsop sugad hin tubig ha iya kalawasan, ngan sugad hin lana ha iya mga tul-an.

¹⁹Sugad hin bado ha iya unta makaputos, sugad hin paha ha iya mag-aalikos.

²⁰Sugara gud hini, O GINOO, han akon mga kaaway an imo kastigo; adton mga nagpapakaraot ha akon, pinaagi han ira magpintas nga pulong.

²¹Kundi, Ginoo, DYOS ko, tabangi ako, sumala hadton ha akon iginsaad nimo; tabangi gad ako ngan imo talwason, tungod han dako mo nga paghigugma ha akon.

²²Kablas na ako ngan nagkikinahanglan, tugob an akon kasingkasing hin kasakitan.

²³Daw lambong ha gab-i, haros diri hikit-an, napapalid ako sugad hin apan.

²⁴Tungod hin gutom an akon tuhod magluya, lawas ko manipis, duro hin kagasa.

²⁵Kon nakita hira, ginyuyubit ako, nagpipilingpiling an ira mga ulo.

²⁶Tabangi ako, O Dyos nga akon GINOO, talwasa gad tungod han dayon nga gugma mo.

²⁷Ipasabot gad han mga kaaway ko, ikaw an natalwas ha akon hin tutoo.

²⁸Bangin ira ako panhimaraoton, kundi ikaw in maglilipay ha akon; maraogdaog ha akon, imo pagdag-on,[198] ngan ako, surugoon mo, magmalipayon.

²⁹Hinaut nga adton mga kaaway ko, maputos na hira hin kaalo; isul-ot na nira an ira kaawod nga duro, sugad hin hilawig nga ira mga bado.

³⁰Hin dako nga tingog ngadto han GINOO, magpapasalamat gud ha iya ako; ngan hiya gud an pagdadayawon ko, dida han katirok han mga tawo.

³¹Tungod kay iya gud ginpapanalipdan, an kablas nga tawo iya inuogopan; iya gintatalwas nga diri patayon, han nagsirot ha iya nga maghurukom.