Read Waray Samarenyo Meaning Based Mga Salmo 111 Bible Online

Mga Salmo 111 - Waray Samarenyo Meaning Based bible

Mga Salmo 111

¹O, pagdayawon gud naton an GINOO! Ha GINOO magpapasalamat ako, inupdan han bug-os nga kasingkasing ko, dida han katirok iya mga tawo.

²Pagkadagko gud ngan pagkaurosahon han kanan GINOO mga buruhaton; nga ha ira nagmalipayon an tanan, karuyag gud nira ito mahisabtan.

³Puno'n kadungganan ngan pagkaharangdon, an tanan nga iya mga buruhaton; sugad man hadton iya pagkamatadong, waray kataposan ngan nagpapadayon.

⁴Urosahon niya mga ginawian, di' hiya natugot nga at' hingalimtan; hiya an GINOO napaid han tanan mahigugmaon ngan malolooyon man.

⁵Hiya an nahatag hin mga pagkaon, ha ira nga ha iya gud mahadlokon; ngan diri gud hiya nga malilimoton hadton iya mga ginsaad ha aton.

⁶Iya ginpakita ha iya katawhan adton iya dako nga pagkagamhanan; pinaagi han paghatagi ha ira hadton kanan lumalangyaw mga tuna.

⁷An buhat niya magtadong an ngatanan, kasarigan an iya kasugoanan.

⁸Nagpapadayon gud ha takna ngatanan nga pagtutumanon ha kamatuoran.

⁹Ha iya katawhan, pagtalwas gindara, ngan ginpakisabutan gud niya hira. Ginkauyonan nga magpapadayon pa, baraan gudman ngan gamhanan pa hiya!

¹⁰An pagkahadlok ha Dyos nga GINOO man amo an tinikangan han kinaadman,[202] an magbuhat hito may'da sarabotan, hiya pagdadayawon ha kadayonan!