Read Waray Samarenyo Meaning Based Mga Salmo 112 Bible Online

Mga Salmo 112 - Waray Samarenyo Meaning Based bible

Mga Salmo 112

¹Dayawon an GINOO! Malipayon an tawo nga natahod han GINOO, nga nalilipay pagtuman han iya mga sugo!

²An mga anak han tawo nga buotan, dinhe ha tuna magagamhanan; magmamalipayon an iya katulinan.

³An iya panimalay magigin manggaran, magmamainuswagon hiya ha kadayonan.

⁴An kapawa malamrag ha kasisidman, para hadton mga tawo nga buotan; para hadton maloloy-on ug magtadong, ngan han mga tawo nga mahigugmaon.

⁵Palaran an tawo nga diri makuri utangan, ngan tangkod an iya mga binuhatan.

⁶Diri mapapakyas an tawo nga buotan, ngan dayuday diri ini hira hingangalimtan.

⁷Hiya an tawo nga waray kahadlokan, han magraot nga sumat nga iya hinbabatian; an pagtoo niya may-ada kadig-onan, kay GINOO la an iya sinasarigan.

⁸Waray niya kabaraka ug kagupong, waray dida ha iya an kamahadlokon; waray ruhaduha nga iya kikitaon, nga an iya mga kaaway pagpupukanon.

⁹Hadton mga kablas hiya mahinatagon, waray utlanan an iya kamaloloy-on; hiya an magigin makagarahum, ngan takus man liwat pagtahoron.

¹⁰Kon nakita hini, an magraot nasisina, nabuslong ha pagdumot ug dayon nawawara; an ira paglaom, an ira mga ungara, ha kadayonan gud an ira kapara.