Read Waray Samarenyo Meaning Based Mga Salmo 115 Bible Online

Mga Salmo 115 - Waray Samarenyo Meaning Based bible

Mga Salmo 115

¹Kinahanglan ha imo la paghimoon an pagdayaw, O GINOO, di' ha amon. Tungod ha im' gugma nga mapadayonon, ngan tungod han imo kamatinumanon.

²Kay ano nga kami ginpapakianhan han mga nasod, “Iyo Dyos hain na man?”

³An amon Dyos aadto ha kalangitan, ginbubuhat n'ya iya naruruyagan.

⁴Salapi, bulawan ira kadiyosan, nga himo hin mga kamot hin katawhan.

⁵May nira baba nga di' nakakayakan, ngan mga mata nga waray hinkikit-an.

⁶May nira diri nadungog nga talinga, diri nakakabaho adton irong nira;

⁷may-ada mga kamot nga diri naabat, ngan may tiil nga diri nakakalakat. Waray gud tingog nga nahihimo nira,

⁸masugad unta[203] an naghimo ha ira; masugad han diyos nga ira ginporma an ngatanan gud nga nasarig ha ira.

⁹Katawhan Israel, sarigi'n GINOO, kabulig ngan panalipod hiya niyo.

¹⁰Kapadian han Dyos, sarigi'n GINOO, kabulig ngan panalipod hiya niyo.

¹¹Magsiringba han Dyos, sarigi'n GINOO, kabulig ngan panalipod hiya niyo.

¹²An GINOO nahinunumdom ha aton, iya kita nga pagpapakaupayon.

¹³Ginpapakaupay niya an ngatanan nga nagbubuhat ha iy'n kadungganan; an mga natahod ha iyo ngatanan, pareho madagko o magudtiay man.

¹⁴Hatagan unta han Dyos hin kaanakan— kamo ngan an iyo mga katulinan.

¹⁵Kamo han GINOO unta bendisyonan, han naghimo han langit ngan kalibutan!

¹⁶Iya han GINOO adton kalangitan, kundi ginhatag n'ya'n tuna ha katawhan.

¹⁷Mga patay diri han Dyos magdadayaw, hadton nalusad ha tuna nga mamingaw.[204]

¹⁸Kundi kita nga amo'n mga buhi pa, kita an magpapasalamat ha iya; ito yana gud ngan ha kadayonan na, pagdayawon an GINOO! Pagdayawa!