Read Waray Samarenyo Meaning Based Mga Salmo 116 Bible Online

Mga Salmo 116 - Waray Samarenyo Meaning Based bible

Mga Salmo 116

¹Akon hinihigugma gud an GINOO, kay iya man pinamamatian ako. Pinamamatian ak' mga pag-ampo,

²namamati hiya kada pagtawag ko.

³Adton kataragman hadton kamatayon, amo an pirme naglilibot ha akon; an duro nga kahadlok hadton lubnganan, amo ini an ha akon nadutdot man. Nag-antos ako hin duro nga kakulba, ngan hin pagturaw gud ngan hin kabaraka.

⁴Niyan nagtawag ak' ngadto han GINOO, “Intawon, GINOO, talwasa gad ako!”

⁵Maloloy-on ngan maupay an GINOO, an aton Dyos mapinairon hin duro.

⁶Gin-aagak niya an kablas nga tawo, han kataragman gintalwas niya ako.

⁷Sarig, tapod nala, O kasingkasing ko, balik, O kalag ko, nga't han pahuway mo; kay nagin maupay ha ak' an GINOO, ngan iya gintagad hin maupay ako.

⁸An GINOO amo'n nagtalwas ha akon tikang han kataragman han kamatayon; iya ginpahiran mga luha nakon, ngan iya ginpugngan nga ak' pagpirdehon.

⁹Amo ito nga naglalakat na ako dida ha atubangan na han GINOO; ha kalibutan han mga buhi didto, akon gintipigan an akon pagtoo.

¹⁰Natoo pa bisan nagsiring na ako, “Nahirugmok na gud ako hin kompleto;”

¹¹bisan kon nahadlok ngan nasiring ako, “Waray nagud usa nga kasarigan ko.”

¹²Ano an ak' igbabalos han GINOO, han ngatanan niya nga kaupayan ko?

¹³Pagdadad-an ko h'ya hin halad nga bino, nga pasalamat nga gintalwas n'ya ako.

¹⁴Babaydan ko'n GINOO'n ak' ginsumpaan, dida ha katirok han iya katawhan;

¹⁵ha pagtan-aw han GINOO mahal gudman an kamatayon han 'ya mga baraan.

¹⁶Imo ako surugoon, O GINOO, ngan nag-aalagad gud ako ha imo; sugad gud han ginbuhat hadton nanay ko, tikang hin kamatay gintalwas mo ako.

¹⁷Ighahalad, ighahatag ko ha imo, halad nga tinubod nga pasalamat ko; ngan maghahalad ak' han akon pag-ampo, ngan matatawag han ngaran han GINOO.

¹⁸Ha katirok han tanan mo nga katawhan, ha Templo han Jerusalem nga bungsaran, akon ighahatag an ak' ginsumpaan, pagdayawa an GINOO! Paghalaran!