Read Waray Samarenyo Meaning Based Mga Salmo 132 Bible Online

Mga Salmo 132 - Waray Samarenyo Meaning Based bible

Mga Salmo 132

¹Ayaw hingalimti hi David, GINOO, sugad man han magkuri iya nahimo.

²An pagsumpa niya ha GINOO hadto ha Gamhanan nga Dyos ni Israel, kuno:

³“Diri ak' mauli ha akon higdaan,

⁴diri ko pahuwayan o katurogan.

⁵Tubtob an GINOO hin dapit katagan, balay han kan Israel Dyos nga Gamhanan.”

⁶Ha Betlehem amon ito hinbatian, hiunong han Kahon hadton Ginsaaran. Ngan amon gihapon ito hin-agian, didto han kan Jaar mga kapatagan.

⁷Amon iginsiring, “Aton na kadtoon, adton urokyanan han GINOO naton; ngan didto aton na hiya pagsingbahon, atubangan han iya trono gihapon!”

⁸Kadi ha pahuwayanan mo, GINOO, upod hadton Kahon han Ginsaaran. Ini an tigaman, ini an simbolo, han imo kakusgan ngan kagamhanan mo.

⁹Igsangyaw na unta han im' kapadian, nga magtaralwas ka han imo katawhan. Manggogliat unta nga may kalipayan hira adton imo katawhan ngatanan!

¹⁰Tungod gud kan David, iginsaad nimo ngadto gud ha iya nga surugoon mo. Ayaw isalikway, ayaw pahirayo, han im' pinili nga hadi, O GINOO!

¹¹Ginhimo kan David saad nga sagrado, ngan diri na nimo babawion ito: “Usa han im' anak pahahadion ko, maghahadi hiya sunod gud ha imo.

¹²Kon an imo mga anak magtuman la han ak' ginsaaran ngan sugo ha ira; mga anak liwat nira masunod pa ha imo ngan maghahadi tanan takna.”

¹³An Sion man an ginpili han GINOO, karuyag gud niya an pag-ukoy didto:

¹⁴“Amo ini an dayon nga urokyan ko, dinhe'n karuyag ko nga maghadi ako.

¹⁵An Sion an akon tatagan, pupun-on han tanan nga iya pagkinahanglanon. Iya mga kablas akon pagbubusgon hin ira kinahanglanon nga pagkaon.

¹⁶Kapadian niya ak' pasasangyawon nga ako gud amo'n natalwas gihapon. Ngan katawhan niya magkikinantahon, magkakanta gud hira hin malipayon.

¹⁷Dinhe usa han kan David kaliwatan hihimoon ko nga hadi nga gamhanan. Dinhe an pinili ko nga hadi gudman an paghadi niya akon babantayan.

¹⁸Iya mga kaaway ak' susul-utan, mga panapton han ira kaarawdan. Kundi bahin hadton iya ginhadian magigin-bungaan ngan may kauswagan.”