Read Waray Samarenyo Meaning Based Mga Salmo 135 Bible Online

Mga Salmo 135 - Waray Samarenyo Meaning Based bible

Mga Salmo 135

¹Day'gon an Ginoo! Ngaran n'ya dayawon, kamo nga iya gud mga surugoon,

²nga nanindog ha balay han GINOO, dit' ha sakob han kanan atong Dyos Templo.

³Dayawa'n GINOO, kay maupay hiya, kay maloloy-on h'ya,[216] kantahi'n ngaran n'ya.

⁴Ginpili hi Jacob para gud ha iya, katawhan Israel gin-angkon pa niya.

⁵Sayod ako nga an GINOO gamhanan, labaw pa gud hiya han diyos ngatanan.

⁶Binubuhat niya'n iya naruyagan ha langit, tuna, dagat, nga kahiladman.

⁷Dara niya kanan bagyo kadampogan, tikang gud han sidsid hinin kalibutan. Nahimo hin kikidlat para han uran dara'n hangin tikang han iya himosan.

⁸Ginpatay n'ya'n tanan suhag ha Ehipto hadto mga hayop ngan han mga tawo.

⁹Didto nagpakita hin mga milagro, kontra kan Paraon ngan tanan pangulo.

¹⁰Damo'n mga nasod nga ginbungkag niya, ginpatay gamhanan mga hadi nira;

¹¹hi Sihon, hadi han mga Amorita, ngan hi Og nga hadi han Basan nga tuna. Ngan ginpatay pa an tanan kahadian han mga ginhadian di't ha Canaan.

¹²Ginhatag ira tuna ha 'ya katawhan, katawhan Israel an iya tinagan.

¹³Pirme manta ini nga hibabaroan, nga ikaw, GINOO, an Dyos han ngatanan. Ngan pirme ka liwat nga hinunumdoman han ngatanan gud nga mga katulinan.

¹⁴An GINOO magmamalolooyon man, hadton iya ngahaw nga mga katawhan. Iya hira tatagan na'n kagawasan, hira nga iya mga surugoon man.

¹⁵Mga diyosdiyos hadton kanasoran, hinimo la hin salapi ug bulawan. Pinorma la hira hin mga katawhan, kanan tawo mga kamot hinimoan.

¹⁶Diri nagyayakan adton ira baba, ira mga mata, diri man nakita.

¹⁷Ngan diri nabati, an ira talinga, waray gininhawa adton ira baba.

¹⁸Mapareho unta han diyosdiyos man, nga ira la ngahaw mga hinimoan, adton nanaghimo ha ira ngatanan, ngan an nasarig ha ira nga katawhan.[217]

¹⁹Katawhan Israel, dayawa'n GINOO! Kapadian han Dyos, dayawa'n GINOO!

²⁰Ngan mga Levita, dayawa'n GINOO! Tanan nga nahadlok, dayawa'n GINOO!

²¹Aton pagdayawon hiya nga GINOO, tikang han Sion, an ha bukid nga bungto. Hiya nga ha Jerusalem nagpupuyo, aton pagdayawon, hiya nga GINOO!