Read Waray Samarenyo Meaning Based Mga Salmo 136 Bible Online

Mga Salmo 136 - Waray Samarenyo Meaning Based bible

Mga Salmo 136

¹Adton GINOO pagpasalamatan ta, kay padayon gud an iya paghigugma. Pagpasalamatan kay maupay hiya, kay padayon gud an iya paghigugma.

²Dyos han kadiyosan pasalamatan ta kay padayon gud an iya paghigugma. Labaw han tanan nga kadiyosan hiya, kay padayon gud an iya paghigugma.

³An gigagamhani pasalamatan ta, kay padayon gud an iya paghigugma; GINOO han mga Ginoo man hiya, kay padayon gud an iya paghigugma.

⁴An nagbubuhat hin dagko hiya gudla, kay padayon gud an iya paghigugma. Dagko'ng mga milagro an buhat niya, kay padayon gud an iya paghigugma.

⁵An kalangitan amo an buhat niya, kay padayon gud an iya paghigugma. Iya ginbuhat han kinaadman niya, kay padayon gud an iya paghigugma.

⁶Amo hiya an nagbitad hadton tuna, kay padayon gud an iya paghigugma. Ha bawbaw han katubigan gintindog n'ya, kay padayon gud an iya paghigugma.

⁷Iya ginhimo an dagko nga kapawa, kay padayon gud an iya paghigugma. An adlaw ngan an bulan ginhimo niya, kay padayon gud an iya paghigugma.

⁸An adlaw hin paghadi an kaadlawon, kay padayon gud an iya paghigugma.

⁹Bulan, kabiton-an hadi'n kagab-ihon, kay padayon gud an iya paghigugma.

¹⁰Mga Ehiptohanon ginpatay niya, kay padayon gud an iya paghigugma. Mga suhag nga kalalaken-an nira, kay padayon gud an iya paghigugma.

¹¹Tikang ha Ehipto ginmandoan hira, kay padayon gud an iya paghigugma. An katawhan ini han Israel niya, kay padayon gud an iya paghigugma.

¹²Pinaagi han kusgan nga kamot niya, kay padayon gud an iya paghigugma. Han gamhanan nga butkon gindara hira, kay padayon gud an iya paghigugma.

¹³Ginbuhag niya adton Dagat Pula, kay padayon gud an iya paghigugma.

¹⁴Dida hin ginpaagi'n katawhan n'ya, kay padayon gud an iya paghigugma.

¹⁵An hadi han Ehipto ginlumos niya, kay padayon gud an iya paghigugma. Pati an mga kasondalohan niya, kay padayon gud an iya paghigugma.

¹⁶An iya katawhan ginmandoan niya, kay padayon gud an iya paghigugma. Paglatas han kamingawan nga mamara, kay padayon gud an iya paghigugma.

¹⁷Gamhanan kahadian ginpatay niya, kay padayon gud an iya paghigugma.

¹⁸Bantog nga kahadian ginpatay niya, kay padayon gud an iya paghigugma.

¹⁹Ginpatay hadi Sihon nga Amorita, kay padayon gud an iya paghigugma.

²⁰Pati hi Og nga hadi han Basan hiya, kay padayon gud an iya paghigugma.

²¹Iya iginhatag adton ira tuna, kay padayon gud an iya paghigugma. Ginhatag ngadto hadton katawhan niya, kay padayon gud an iya paghigugma.

²²Ngadto ha Israel iginhatag niya, kay padayon gud an iya paghigugma. Ha kan Israel nga surugoon niya, kay padayon gud an iya paghigugma.

²³Waray gudman kita niya paglimota, kay padayon gud an iya paghigugma. Bisan dida han ginpirde na gud kita, kay padayon gud an iya paghigugma.

²⁴Ngan iya man nga ginpabuhian kita, kay padayon gud an iya paghigugma. Ginlibre tikang han mga kaaway ta, kay padayon gud an iya paghigugma.

²⁵Hin mga pagkaon gintatagan niya, kay padayon gud an iya paghigugma. Tanan mga buhi nga binuhat niya, kay padayon gud an iya paghigugma.

²⁶Ighatag an mga pagpasalamat ta, kay padayon gud an iya paghigugma. An Dyos han langit pagpasalamati na, kay padayon gud an iya paghigugma.