Read Waray Samarenyo Meaning Based Mga Salmo 139 Bible Online

Mga Salmo 139 - Waray Samarenyo Meaning Based bible

Mga Salmo 139

¹[220] O GINOO, gin-usisa mo ako, ngan kinikilala mo ako.

²Maaram ka han ngatanan nga akon binubuhat, nasasabtan mo tikang hin hirayo an ngatanan nga akon panhunahuna.

³Kinikita mo ako, kon nagbubuhat o kon napahuway ba ako; maaram ka han ngatanan nga akon mga ginawian.

⁴Maaram ka na ngadaan han akon igsisiring bisan diri pa ako nagyayakan.

⁵Gin-aalirongan mo ako, ha kada ligid; pinananalipdan mo ako han imo gahom.

⁶Urosahon kaupay an imo pagkilala ha akon; uraura ito hin kahilarom nga di' ko matugkad.

⁷Ngain man ako papalagiw tikang han imo espiritu? Ngain man ako lilikaw han imo presensya?

⁸Kon kumadto ako ha langit, aadto ka; kon pumahuway ako ha lubnganan, aadto ka.

⁹Kon lumupad ako lahos pa han sinirangan, o mag-ukoy ha gihaharayoi nga lugar han katundan,

¹⁰aadto ka didto pagmando ha akon, aadto ka didto pagbulig ha akon.

¹¹Makakahangyo ako han kasisidman pagtago ha akon, o han kapawa nga nagpapalibot ha akon nga magin kagab-ihon.

¹²Kundi diri masirom ha imo bisan pa an kasisidman, ngan sugad gudla han adlaw kalamrag an gab-i. Pareho la ha imo an kasisidman ngan an kapawa.

¹³Ikaw an naghimo han tagsa ko nga bahin; ginturugkop mo ako ha tagoangkan han akon iroy.

¹⁴Gindadayaw ko ikaw kay angay ka kahadlokan; makabuburong ngan urosahon an ngatanan nga imo binubuhat. Sayod ako hito ha bug-os ko nga kasingkasing.

¹⁵Hinkit-an mo nga ginpuporma an akon mga tul-an, ginhinayhinay pagturogkopa ha tagoangkan han ako iroy, han nagtutubo ako hin sekreto didto.

¹⁶Hinkit-an mo ako han waray pa ako katatawo. Iginlista ngatanan ha imo basahon an mga adlaw nga ginhimo para ha akon, han waray pa ngani magtikang in bisan usa ha ira.

¹⁷O Dyos, pagkamakuri para ha akon han imo mga panhunahuna;[221] pagkadamo gud hin duro nira!

¹⁸Kon ihapon ko hira, labaw pa hira kadamo han baras. Upod la gihapon ako nimo, ha akon pagmata.

¹⁹O Dyos, karuyag ko gud unta nga imo pamatayon an mga magraot! Karuyag ko gud unta nga pababay-an la ako han magpintas nga mga tawo!

²⁰Nagpapakaraot hira ha imo; nagyayakan hira hin magraot nga mga butang kontra han imo ngaran.[222]

²¹O GINOO, napupungot gud ako hadton mga napupungot ha imo! Gintatamay ko gud adton mga nasupil ha imo!

²²Hingpit gud an akon kapungot ha ira; Iniisip ko hira nga akon mga kaaway.

²³Susiha ako, O Dyos, ngan tugkara an akon kasingkasing; sarihi ako, ngan santopa an akon mga panhunahuna.

²⁴Kitaa kon may-ada bisan ano nga karat-an ha akon, ngan mandoi ako dida han dayon nga agianan.[223]