Read Waray Samarenyo Meaning Based Mga Salmo 141 Bible Online

Mga Salmo 141 - Waray Samarenyo Meaning Based bible

Mga Salmo 141

¹[226] Nasangpit ako ha imo, GINOO, tabangi ako, pamatii ako kon matawag ako ha imo.

²Karawata an akon pag-ampo sugad hin insyenso, an akon binayaw nga kamot, gab-i nga halad ha imo.

³O GINOO, bantayi gad an akon baba, ngan butangi an akon mga im-im hin gwardya.

⁴Ayaw itugot nga magbuhat ako hin karat-an, ngan umungay ako han magraot nga katawhan. Diri unta ako makatampo han ira sasaro, han ira mga patuyaw nga karisyo.

⁵Bangin ako hin maupay nga tawo pagsirotan, ngan tungod hin kalooy iya ako pagbusaan. Kundi diri ako makarawat hin kadungganan, tikang ha mga magraot nga katawhan.

⁶Kon an punoan nira ha umpas hulogon, an mga tawo matuod han akon mga pulong.

⁷Sugad hin kahoy nga ginbukabuka, an ira tul-an nagsasarang ha lubnganan nga tuna.[227]

⁸Kundi ako, O Dyos nga akon GINOO, magpapadayon hin pagsarig ha imo. Akon ginbibiling an panalipod mo, ayaw gad itugot nga mamatay ako.

⁹Ha ira bitik panalipdi ako, ngan han mga tarhog han magraot nga tawo.

¹⁰Ha ira ngahaw bitik hira hidadakpan, samtang ako malabay diri hisasakban.