Read Waray Samarenyo Meaning Based Mga Salmo 144 Bible Online

Mga Salmo 144 - Waray Samarenyo Meaning Based bible

Mga Salmo 144

¹[231] An GINOO amo gud an darayawon, kay amo man hiya'n panalipod nakon. Ha pag-awayan h'ya'n natutdo ha akon ngan nag-aandam ha akon hin pagsulong.

²Hiya'n akon panalipod ngan depensa, akon arayopan ngan magtaralwas pa, bas' masiguro nasarig ak' ha iya, sakop kong' katawhan gindadaog niya.

³Ano manggud inin tawo, O GINOO, nga imo man hiya pinanginginano? Tawo man la unta kay ano gud ito nga pinaninimangno gud hiya nimo?

⁴Hiya, inin tawo, iya kapareho, daw usa la nga pagginhawa hin tawo. Mga adlaw niya halipot hin duro, sugad la hin lambong nga nalabay ito.

⁵Hiliga, O GINOO, an kalangitan, kadi ngan lumusad ka ha katunaan. Ngan imo kamkamon adton kabukiran, ngan hira man-uusbok hin kaasuhan.

⁶Mga kikidlat imo na paidlapon, mga kaaway mo hira pasarangon. Imo mga pana imo palatoson, ngan imo na hira papagdadlaganon.

⁷Unata'n im' kamot tikang kahitas-an, ngan talwasa ak' tikang han katubigan; Bawia ako tikang han kagamhanan hadton mga langyaw nga mga katawhan.

⁸Kanay mga baba sigi'n pagbinuwa, diri gud nasumat hin matuod hira; Nagbubuwa inupdan pa hin panumpa, nabatasan nira iton pagbinuwa.

⁹Bag-o nga kanta, Dyos, ikaw kakantahan, makanta ako hin arpa dinuyogan.

¹⁰Kahadian tinagan mo'n pagdarag-an, surugoon David tagi'n katalwasan.

¹¹Han magbangis nga kaaway ak' talwasa, gahom han mga langyaw ako bawia. Diri gud nasumat hin matuod hira, nagbubuwa inupdan pa hin panumpa.

¹²An pagkabatan-on mga anak namon masugad unta hin magrampag nga tanom. Am' kadaragan-an harigi magtahom, nga kanan palasyo mga dikorasyon.

¹³Mga kurob namon mapuno na unta han tagsa kalain hadton mga bunga. Mga karnero han mga kaumhan ta magyinukot-yukot mga anak nira.

¹⁴Mag-anak hin damo an am' kabakahan, waray kapunitan o bisan kawad-an. Mawaray unta ha at' kakalsadahan magnguyngoy tungod hin mga kakurian!

¹⁵Palaran gudman in sugad nga katawhan, an nasod nga may sugad nga kaupayan. Palaran gudman in sugad nga katawhan, kanay Dyos amo gud adton GINOO man!