Read Waray Samarenyo Meaning Based Mga Salmo 145 Bible Online

Mga Salmo 145 - Waray Samarenyo Meaning Based bible

Mga Salmo 145

¹[232] Isangyaw ko ikaw, O Dyos, ngan hadi ko, magpapasalamat hin dayon ha imo.

²Adlaw-adlaw magpapasalamat ako, hin waray paghunong ikaw dayawon ko.

³Pagkadako gudman niya nga GINOO, angay hiya pagdayawon hin tutoo. Diri gud masantop iya pagkadako, labaw pa gud han ngatanan kahibaro.

⁴An ngatanan gud nga imo binuhatan pagdadayawon ha tanan katuigan. Dagkong' mga buhat mo igsasangyaw man han sunod-sunod nga mga katulinan.

⁵Imo kagamhanan ngan pagkaharangdon hadton mga tawo paghihimangrawon. Akon dudumdumon, pamamalandungon, mga binuhatan mo nga urosahon.

⁶Paghihimangrawon buhat mo'ng gamhanan, ngan im' pagkadako ak' igsasangyaw man.

⁷Igsusumat nira'n imo kaupayan, hiunong han im' kalooy kakantahan.

⁸GINOO mahigugmaon, maloloy-on, mahinay masina, may gugma nga dayon.

⁹Maupay ha tanan hiya nga GINOO, ha tanan binuhat napaid hin husto.

¹⁰Tanan nga im' mga binuhat, GINOO, mananagdayaw gud ngatanan ha imo. Ngan pagpapasalamatan ka na hadto, han ngatanan gud nga imo mga tawo.

¹¹An kaharangdon han imo ginhadian amo gud an ira paghihimangrawan. Ira igsusumat ngadto han ngatanan an imo kakusgan, imo kagamhanan.

¹²Hisabtan han tanan buhat mong' gamhanan, ngan an kaanyag gud han im' ginhadian.

¹³An im' ginhadian magpapadayon man, maghahadi ka hin waray kataposan. Iya saad, GINOO matinumanon, ngan tangkod han iya mga buruhaton.

¹⁴Iya binubuligan an nagugupong, an ginraogdaog iya binabangon.

¹⁵Natan-aw nga malinaumon ha iya, an ngatanan butang nga mga buhi pa. Ngan ha ira ihinahatag man niya, an pagkaon kon kinahanglan gud nira.

¹⁶Igo an ihinahatag n'ya han tanan, ginbubusog ira mga kinahanglan;

¹⁷GINOO matadong iya binuhatan, tanan nga buhat niya maloloy-on man.

¹⁸Duok h'ya han tanan natawag ha iya, kon kinasingkasing an pagtawag nira.

¹⁹Tumanon ungara'n nahadlok ha iya, pinamamatian, tinatalwas hira.

²⁰Nahigugma ha iya, pananalipdan, kundi bubungkagon yawan-on ngatanan.

²¹Daygon ko'n GINOO ngan putli n'yang ngaran, daygon hin dayon han binuhat ngatanan!