Read Waray Samarenyo Meaning Based Mga Salmo 147 Bible Online

Mga Salmo 147 - Waray Samarenyo Meaning Based bible

Mga Salmo 147

¹Pagdayawon an GINOO! Pagdayawon! Maupay an pagkanta nga't han Dyos naton. Pagdayaw pinaagi hin karantahon, pagdayaw ha iya maupay, matadong.

²Iginpapahiuli na han GINOO, Jerusalem ngan bihag nga mga tawo.

³Iya gintatambal mga nabibido, ira mga samad ginbubutok ito.

⁴Gin-isip na niya mga kabiton-an, gintatawag an tagsa ha iya ngaran.

⁵An aton GINOO dako ngan gamhanan, diri matugkad an iya kinaadman.

⁶Ginbabayaw n'ya an mapinaubsanon, kundi gindudugmok ha tuna'n yawan-on.

⁷Dayawa an GINOO hin karantahon, ngadto han aton Dyos arpa pagtokaron.

⁸Gin-aatag n'ya ha langit kadampogan, inin tuna iya ginpapaoranan. Ngan ginpapatubo n'ya an kabanwaan, didto ha bawbaw han mga kapungtoran.

⁹Han ira pagkaon iya gintatagan, an ginugutom nga mga kamanampan. Ngan iya man liwat nga gintutubongan, an nangingiyak piso nga katamsihan.

¹⁰Diri aada an iya kalipayan dida han magkusog nga kakabayohan. Ngan diri man ada'n iya kaliawan han mag-isog nga mga kasondalohan.

¹¹Kundi asay lugod nalilipayan n'ya, adton nahadlok ngan natahod ha iya. Adton naglalaom, nasarig, natagya, dida han dayuday n'ya nga paghigugma.

¹²Jerusalem, pagdayawa an GINOO! O Sion, pagdayawa adton Dyos nimo!

¹³Ginpaparig-on n'ya mga ganghaan mo, ginpapakaupay n'ya im' mga tawo.

¹⁴Gintatalwas n'ya an im' mga pag-ultan, tikang han tanan nga mga kataragman. Ngan iya ka gud ginpapatagusyahan hadton giuupayi nga katrigohan.

¹⁵Usa nga pagsugo n'ya ngadto han tuna, ngan tuman gud dayon an ginyakan niya.

¹⁶Adton esno gin-aatag ini niya, pareho hin taplak, taplak nga delana. Bagtik na nga tun-og iya ginsasarang nga daw tapotapo o daw hin agbon man.

¹⁷Ginsusugo niya an yelo nga uran, nga daw mga graba nga nabunok gudman. Waray nailob han iya ginpadara nga duro nga kahagkot nganhi ha tuna.

¹⁸Katapos nagsusugo na liwat hiya, ngan an yelo natutunaw, nawawara. Iya ginsusugo adton kahanginan, ngan naawas liwat adton katubigan.

¹⁹Nahatag h'ya'n pulong ha iya katawhan, kan Israel mga balaod, tugon man.

²⁰Waray gudman ini niya pagbuhata ngadto han mga kanasoran nga iba. Mga balaod n'ya di' mag-aram hira. An GINOO pagdayawa, pagdayawa!