Read Waray Samarenyo Meaning Based Mga Salmo 19 Bible Online

Mga Salmo 19 - Waray Samarenyo Meaning Based bible

Mga Salmo 19

¹[29] Dayag ha langit kanan Dyos kagamhanan! Klaro nakikita iya binuhatan!

²Adlaw-adlaw nagpapahibaro ini, ngan ginbabalik pagsumat gab-i-gab-i.

³Waray nira pulong o waray mga yakan, waray nira tingog nga hinbabatian.

⁴Kundi ira mensahe[30] han tuna ginmuop, nga ha bug-os nga kalibutan nakalukop.

⁵Tulda han adlaw han Dyos ginpahamutang, nga kada aga napunias, nasirang; sugad gud han malipayon nga karaslon, ngan mag-uroyag nga madalagan dayon.

⁶An adlaw natikang ha usa nga dapit, ngan natalabok ngat' ha luyo han langit; Ha iya kamapaso ug kamaping-it, waray makakatago, bisan pa kalit.

⁷Hingpit an balaod nga kanan GINOO, nahatag ini hin kusog nga bag-o. An sugo han GINOO kasasarigan, ha mga tapang nahatag hin kinaadman.

⁸Magtadong kanan GINOO turumanon, hadton mga natuman nga malipayon. Matadong an kanan GINOO mga sugo, han hunahuna nahatag hin hibaro.

⁹Pagsingba han GINOO buhat nga maupay, Magpapadayon ug hin katapos waray. Hukom han GINOO matadong ngatanan, waray pinipili, waray dinapigan.

¹⁰Mahal pa kay han pinurog nga bulawan, mas matam-is pa han dugos han putyokan.

¹¹Imo oripon hin kaaram natagan, Balos ini niya han akon pagtuman.

¹²Han iya ngahaw sayop waray nakita, han tago nga sala, hi ako bawia.

¹³Han tinuyo nga sala, ako talwasa, ayaw hira ha akon papaghadia. Ngan mahihingpit an akon kinabuhi, ngan magagawas na han sala nga grabi.

¹⁴Itugot nga inin akon mga pulong, pati inin akon mga pamalandong, ha atubangan mo unta karawaton, GINOO, darangpan, manunubos nakon!