Read Waray Samarenyo Meaning Based Mga Salmo 2 Bible Online

Mga Salmo 2 - Waray Samarenyo Meaning Based bible

Mga Salmo 2

¹Kay ano nga an kanasoran, nagplano man hin kasamokan? Kay ano nga an mga tawo, waray hangkag nga hin plano naghimo?

²Nasupak, nasupil an ira kahadian, nagkaarabuyon pa an ira mga punoan; han GINOO nga Dyos hin pagkontra, pati an Hadi nga ginpili nira.

³“Gawas kita han pagkahadi nira, isalikway ta an ira pagdumara.” Amo ini an siring nira.

⁴Tikang ha langit han iya trono, gintinawaan la hira han GINOO. Gintamay an ira maluya nga plano.

⁵Ha iya kasina, hira ginpahimangno; ginhadlok hira han kapungot niya nga duro.

⁶Iya siring, “Ha Sion,[1] bukid nga baraan, an akon hadi akon igbubutang.”

⁷Siring han hadi, “Akon ipapahibaro, an pulong ha akon han GINOO. Nagsiring hiya, ‘Ikaw an anak ko, Yana nga adlaw ako an amay nimo.

⁸Pangaro kay ikaw akon tatagan, imo an ngatanan nga kanasoran, ug an bug-os nga kalibutan.

⁹Mahigpit nga gahom an imo paghadi ha ira, Magsasarang hira sugad hin buong nga daba.’”

¹⁰Mga kahadian, pamatii ako, hini nga akon pahimatngon ha iyo; pag-aram kamo hini nga pagturon-an, kamo nga mga punoan han kalibutan:

¹¹Pagataman upod hin kahadlok han GINOO, ha iya atubangan pangurog

¹²ngan yukbo;[2] ngan bangin dumugang an iya kasina, ngan mapatay kamo hin tigda. Malipayon an ngatanan nga mapakadto, hin panalipod ha iya pangaro.