Read Waray Samarenyo Meaning Based Mga Salmo 22 Bible Online

Mga Salmo 22 - Waray Samarenyo Meaning Based bible

Mga Salmo 22

¹[34] Dyos ko, Dyos ko, kay ano nga ginpabay-an mo ako? Nagtawag ako hin waray hunong nga pakibulig kundi waray gudla gihapon umabot ini ha akon.

²Ha adlaw natawag ako ha imo, O Dyos ko, kundi diri ako nakakapahuway.

³Ginpasidunggan ka nga amo an Baraan, an gindadayaw han Israel.

⁴Ginsasarigan ka han amon kaapoy-apoyan; ginsarigan ka nira, ngan gintalwas mo hira.

⁵Gintawag ka nira ngan nakalikay hira hin kataragman. Ginsarigan ka nira ngan waray hira magbasol.

⁶Kundi diri ako tawo, ulod la ako, tinamay ngan yinubit han ngatanan!

⁷Gintataw-an ako han ngatanan nga nakita ha akon; nanyayam-id hira ngan naglilingolingo.

⁸“Tinmapod ka han GINOO,” nasiring hira. “Kay ano nga diri ka tinatalwas niya? Kon kinaruruyag ka han GINOO, kay ano nga diri ka niya binubuligan?”

⁹Ikaw an nagtalwas ha akon dida han akon katawo, ngan pinanalipdan mo han minasus-an pa ako.

¹⁰Tinmapod ako ha imo tikang pa han akon katawo, ngan ikaw gud an akon Dyos tikang pa hadto.

¹¹Ayaw pahirayo ha akon! Kay hirani an kasamokan ngan waray gud iba nga mabangon ha akon.

¹²Damo nga mga kaaway an naglilibot ha akon pareho hin todo nga mga baka, aada hira naglilibot ha akon, pareho hin magpintas nga mga todo tikang han tuna ha Basan.

¹³Nanganga an ira baba pareho hin mga liyon, nga nagngungurob pag-ibaranghag ha akon.

¹⁴Nawara na an akon kusog, sugad hin tubig nga nahuwad ha tuna. Nanhilisa an ngatanan ko nga tul-an; sugad hin tunaw nga sibo an akon kasingkasing.

¹⁵Sugad kamamara hin tapotapo an akon but-ol,[35] ngan nadukot an akon dila ha langag-langag han akon baba. Ginbayaan mo ako sugad hin patay dida ha tapotapo han tuna.

¹⁶Ginlilibotan ako hin hugpo nga mga yawan-on; ginduduok ako nira pareho hin kaayaman; ginkakagat nira[36] an akon mga kamot ngan mga tiil.

¹⁷Nakikita an ngatanan ko nga mga tul-an. Natutok ngan namumudlat ha akon an akon mga kaaway.

¹⁸Ginriripahan nira an akon mga panapton ngan hira la ngahaw an nagbahinbahin.

¹⁹O GINOO, ayaw ako pagbayai! Kadi dayon pagtalwas ha akon!

²⁰Talwasa ako tikang han espada; talwasa ako tikang hini nga kaayaman.

²¹Bawia ako tikang hini nga mga liyon; waray ko gud mahihimo[37] hini nga ihalas nga mga todo.

²²Susumatan ko an akon mga tawo han imo nabuhat, pagdadayawon ko ikaw ha ira katirok:

²³“Pagdayawa hiya, kamo nga mga surugoon han GINOO! Pasidunggi hiya, kamo nga mga tulin ni Jacob! Pagsingbaha hiya, kamo nga mga tawo han Israel!

²⁴Diri niya ginpapabay-an an mga kablas o ginlilimot an ira pag-antos; diri niya hira binabayaan kundi binabaton niya kon natawag hira hin pakibulig.”

²⁵Dida han dako nga katirok pagdadayawon ko ikaw tungod han imo nabuhat; ha atubangan hadton nagsisingba ha imo maghahalad ako hin mga halad nga akon iginsaad.

²⁶Makaon an mga kablas ngan mabubusog; magdadayaw ha iya adton makada han GINOO. Magmainuswagon unta hira ha kadayonan!

²⁷An ngatanan nga mga nasod manunumdom han GINOO. Mapakadto hira ha iya tikang ha ngatanan nga mga dapit han tuna; magsisingba ha iya an ngatanan nga katawhan.

²⁸Hadi an GINOO, ngan naghahadi hiya han kanasoran.

²⁹Mayukbo ha iya[38] an ngatanan nga magpinahitas-on; mayukbo ha iya atubangan an ngatanan nga mamaratyon.

³⁰Mag-aalagad ha iya an umaabot nga mga katulinan; an mga tawo maghihimangraw han GINOO ngadto han tiarabot nga katulinan.

³¹Pagsusumatan an mga tawo nga waray pa matawo: “Gintalwas han GINOO an iya mga tawo.”