Read Waray Samarenyo Meaning Based Mga Salmo 24 Bible Online

Mga Salmo 24 - Waray Samarenyo Meaning Based bible

Mga Salmo 24

¹[40] An GINOO han kalibutan an tag-iya, an ngatanan pa nga butang nga aada: Pati an tuna upod an mga butang, hiya an tag-ada hini ngatanan.

²Ha hilarom nga dagat iya ini gintindog, didto ha ilarom han tuna iya gin-usok; ngan ginbutang an mga patukoranan, didto ha kahiladman han kalalawdan.

³Hin-o an may katungod nga mga tawo, pagsagka ngadto ha pungtod han GINOO?[41] Hin-o in makakahimo hin pagkadto pagsakob han iya baraan nga Templo?

⁴Amo adton mga putli ha buhat nira, ngan malinis an ira panhunahuna; nga diri nasingba han mga kadiyosan, o nagkakawang han mga ginsaaran.

⁵Pagpapakaupayon gud han GINOO, ngan pagtatalwason in sugad nga tawo. An Dyos amo gud an magpapahibaro, nga waray hira sala nga bisan ano.

⁶Ini nga mga tawo han Dyos madangop, ha atubangan han GINOO ni Jacob.

⁷Buksi hin maupay an mga ganghaan, abrehi an mga daan nga portahan; kay amo ini an iya pag-aagian, han kusgan nga hadi han kahimayaan.

⁸Hin-o ini nga hadi han kahimayaan? An GINOO nga makusog ngan gamhanan; an GINOO nga dara an pagdarag-an, pag-uli niya tikang ha pag-awayan.

⁹Buksi hin maupay an mga ganghaan, abrehi an mga daan nga portahan; kay masulod na an hadi nga bantogan, nga amo an hadi han kahimayaan.

¹⁰Hin-o ini nga hadi han kahimayaan? An GINOO hiya han kasondalohan; an GINOO nga dara an pagdarag-an, hiya an hadi han kahimayaan!