Read Waray Samarenyo Meaning Based Mga Salmo 25 Bible Online

Mga Salmo 25 - Waray Samarenyo Meaning Based bible

Mga Salmo 25

¹[42] Nag-aampo ako ha imo, O GINOO;

²nasarig ako ha imo nga akon Dyos. Talwasa ako tikang han kaarawdan han kapirdehan; ayaw itugot nga manhambog ha akon an akon mga kaaway!

³Diri naabot an kapirdehan hadton mga nasarig ha imo, kundi hadton mga madagmit sumupil ha imo.

⁴GINOO, tutdoi ako han imo mga paagi, ipahayag hira ha akon.

⁵Tutdoi ako pagkinabuhi sumala han imo kamatuoran, Nasarig ako ha imo ha bug-os nga adlaw kay ikaw man an akon Magtaralwas.

⁶GINOO, hinumdomi an imo pagkalooy ngan dayon nga paghigugma nga iginpakita mo tikang pa hin maiha na nga panahon.

⁷Pasaylo-a an mga sala ngan kasaypanan han akon pagkabatan-on. Tungod han imo dayuday nga paghigugma ngan pagkamaupay, hinumdomi ako, O GINOO!

⁸Matadong ngan maupay an GINOO; nagtututdo hiya han dalan nga angay pag-agian han mga makasasala.

⁹Nagmamando hiya han mapinaubsanon ha matadong nga paagi ngan nagtututdo ha ira han iya kaburut-on.

¹⁰Nagmamando hiya hin mahigugmaon ngan matinumanon han ngatanan nga nagsusugot han iya ginkauyonan ngan han iya mga sugo.

¹¹Tumana an imo saad, O GINOO, ngan pasayloa an akon mga sala, kay damo hira hin duro.

¹²Mahibabaro tikang ha iya han dalan nga angay nira pag-agian adton mga nagsusugot han GINOO.

¹³Magmamainuswagon hira pirme, ngan an ira kabataan magpupuyo ha tuna hin waray kataragman.

¹⁴Sangkay an GINOO hadton mga nasugot ha iya, ngan nagtututdo hiya ha ira han iya ginkasabotan.

¹⁵Nakikibulig ako han GINOO ha ngatanan nga panahon, ngan tinatalwas ako niya tikang han kataragman.

¹⁶Lingia gadman ako, O GINOO, ngan kalooyi ako, kay nag-uusaan la ngan maluya ako.

¹⁷Kuhaa an ngatanan nga akon kabaraka ngan talwasa ako tikang han ngatanan ko nga kakurian.

¹⁸Hunahunaa an ngatanan ko nga kagul-anan ngan pag-antos ngan pasaylo-a an ngatanan ko nga mga sala.

¹⁹Tan-awa daw an ngatanan ko nga mga kaaway; kitaa an duro gud nga pagdumot nira ha akon!

²⁰Panalipdi ngan talwasa ako; ipahirayo ako hin kapirdehan kay naayop ako ha imo hin pagpanalipod.

²¹Buhion unta ako han akon kamaupay ngan kamaligdong, kay nasarig ako ha imo.

²²O Dyos, talwasa an imo katawhan, tikang han ngatanan nira nga kakurian!