Read Waray Samarenyo Meaning Based Mga Salmo 26 Bible Online

Mga Salmo 26 - Waray Samarenyo Meaning Based bible

Mga Salmo 26

¹[43] Ipahayag, O GINOO, nga waray ko sala, kay nagbubuhat ako han matadong ngan nasarig ako ha imo hin hingpit.

²Usisaha, O GINOO, ngan pruybahi ako, paghukmi an akon mga ungara ngan panhunahuna.

³Nagmamando ha akon an imo dayon nga paghigugma; nag-uuna pirme ha akon an imo kamatinumanon.[44]

⁴Diri ako nakikig-upod han waray pulos nga mga tawo; waray ko labot han mga salingkapaw.

⁵Nangangalas ako pakigkaupod han magraot nga mga tawo ngan naglilikay ako han mga magraot.

⁶Naghuhunaw ako, O GINOO, pagpakita nga waray ko sala ngan naglilibot han imo altar hin pagsingba.

⁷Nagkakanta ako hin mga pagpasalamat ngan nagsusumat han ngatanan nga orosahon mo nga mga binuhatan.

⁸Hinihigugma ko, O GINOO, an balay nga imo inuokyan, diin nagpupuyo an imo kaanyag.

⁹Ayaw ako paglaglaga upod han mga makasasala; talwasa ako tikang han kapalaran han mga parapamatay hin tawo—

¹⁰nga nagbubuhat hin maraot ha ngatanan nga panahon ngan andam pirme paghukip.

¹¹An para ha akon, nagbubuhat ako hin matadong; kalooyi ako ngan talwasa ako!

¹²Talwas ako tikang han ngatanan nga kataragman; gindadayaw ko an GINOO dida hin pagsingba ha kadam-an!