Read Waray Samarenyo Meaning Based Mga Salmo 27 Bible Online

Mga Salmo 27 - Waray Samarenyo Meaning Based bible

Mga Salmo 27

¹[45] An Dyos akon kapawa ug katalwasan, sanglit waray sadang ko nga kahadlokan. Sinasalipdan ako ha kataragman, hin kakulba diri ako hisasakban.

²Kon han magraot ako sulongon, patayon, hira mapapakdol, matutumba dayon.

³Kon hin kasondalohan ako alirongan, waray bisan ano nga kahahadlokan; kon an mga kaaway sumulong ha akon, an Dyos an akon tataporan gihapon.[46]

⁴Usa nga butang an akon pinangangaro, usa gud la an akon hinahangyo; nga mag-ukoy ako ha balay han GINOO, ngatanan nga adlaw samtang buhi pa ako; basi mamalandong ako han iya kaupayan, ngan mangaro han iya kasalagdonan.

⁵Ha panahon han akon mga kasamokan, hiya an akon angay sasalirongan; waray ko kahadlokan ha iya Templo, ngan murayaw ako ha bawbaw hin bato.

⁶An mga kaaway nga nag-aalirong, akon gud hira ngatanan pagdadag-on. Puno hin kalipay maghahalad ako, ngan mag-aawit pagdayaw han GINOO.

⁷Pamatii, ako nga natawag, GINOO. Kalooyi ngan batona intawon ako!

⁸Pagsiring nimo, “Magsingba ka ha akon,” binmaton ako, “Akon ka dadaopon.”

⁹Ayaw gad tago ha akon atubangan! Ayaw hin kasina ha akon pagpahamtang; ayaw isikway an imo surugoon, kay hi ikaw man la an panabang nakon. Ayaw ako bulagi, ayaw bayai, GINOO nga Dyos an akon mamamawi.

¹⁰Babayaan pa ako han kag-anak ko, Kundi an GINOO ha akon matimangno.

¹¹Itutdo an imo karuyag ha akon, GINOO, an kinahanglan ko buhaton. Ha matadong nga dalan ikaw pagtugway, kay damo inin akon mga kaaway.

¹²Ayaw ako ha mga kaaway itubyan, buwa ug tarhog ha akon igpapukan.

¹³Maaram ako nga hikikit-an ko pa, an pagkamaupay han GINOO yana;

¹⁴Pagtapod ug paglaom han GINOO, ayaw pagturaw, lugod, ha iya tuo.