Read Waray Samarenyo Meaning Based Mga Salmo 30 Bible Online

Mga Salmo 30 - Waray Samarenyo Meaning Based bible

Mga Salmo 30

¹[51] Nagdadayaw ako ha imo, GINOO, kay imo na man gintalwas ako, waray mo itugot mga kaaway nakon, nga ira na la ako pagyinubiton.

²Nagsangpit ako ha imo, akon GINOO, Pakibulig ngan gintambal mo ako.

³Ikakadto na ako ha Kahiladman,[52] kundi kamatayon ko imo ginpudngan.

⁴Pagkanta, pagdayaw kamo han GINOO, kamo, iya matinumanon nga mga tawo; ginbuhat ha imo, ayaw hingalimti, ngan hiya, an Baraan, pasalamati.

⁵Diri nag-iiha an iya kasina, ha kadayonan pagkamaupay niya; bisan pa ha gab-i may-ada mga luha, kundi kalipay naabot pagkaaga.

⁶Waray ko kahadlok ngan natapod ako, waray ha akon makakadaog nga tawo.

⁷GINOO nga Dyos maupay ka ha akon, daw balwarte ha bukid ako nasalirong; kundi ha akon waray ka man pakita, sanglit inatpan gud ako hin kakulba.

⁸Nagtawag man ako ha imo, GINOO, nakimalooy han pakibulig nimo;

⁹“Ano nga maupay an imo aangkonon? Ano an kapulsanan nga kakarawaton? Kon dad-on ta ikaw han akon kamatayon ngan ikadto ta ikaw han akon mga lubong? Nakakahimo ba pagdayaw ha imo adton mga patay na nga mga tawo? Nakakasangyaw ba hira ha imo didto han waray kapakyas nga kamaupay mo?

¹⁰Pamatii, GINOO, ngan kalooyi, intawon hi ako, GINOO, buligi!”

¹¹Imo ginlipay hin sayaw an kabido, nalipay ako, nakuha an kasubo.

¹²Sanglit diri na gud ako magmimingaw, akon kakantahon in mga pagdayaw; GINOO, hi ikaw gud la an Dyos nakon, akon ka pasasalamatan hin dayon.