Read Waray Samarenyo Meaning Based Mga Salmo 32 Bible Online

Mga Salmo 32 - Waray Samarenyo Meaning Based bible

Mga Salmo 32

¹[55] Malipayon adton mga ginpasaylo, han ira mga sala ug mga pag-ato.

²Palaran an tawo nga diri paghukman, han GINOO han iya mga karat-an; ngan waray dida ha iya kinabuhi, an mga paglimbong, mga pagtiyupi.

³Han waray ko pa ha imo igtutug-an, ini gud nga akon mga kasal-anan, waray na haros an akon kagul-anan, hin pagtinangis ko ha adlaw ngatanan.

⁴Adlaw, gab-i, GINOO, an imo kastigo, tubtob nga naubos na gud an kusog ko; daw yamog nga madagmit dayon maanaw, tungod han kapaso han sirak han adlaw.

⁵Niyan ngada ha imo akon gintug-an, waray ko tagoa mga kasaypanan; karuyag ko gud hin pagtug-an ha imo, ngan an mga sala ko imo ginpasaylo.

⁶Adton mainampoon nimo nga mga tawo, kon may kinahanglan,[56] nag-ampo ha imo; kon umabot in lunop hin kakurian, diri gud hira han lunop hiaabutan.

⁷Hi ikaw amo an akon taragoan, pagagawson mo ako ha kakurian; igsisinggit ko an imo katalwasan, kay imo man ako pinapanalipdan.

⁸Siring han Dyos, “Igtututdo ko an dalan, ngan akon hiya hin sagdon tatagan.

⁹Ayaw na pagtig-aha an imo ulo, nga pareho hin mula o hin kabayo; nga kinahanglan hin latob ug bukado, basi magsugot ngan tumuod ha imo.”

¹⁰An magraot lonlon an mga arantoson, kundi waray hini an masinarigon; Han GINOO hira pasasalirongon, hadton iya gugma nga nagpapadayon.

¹¹Paglipay ngan pagrayhak ngatanan kamo, kamo adton mga magtadong nga tawo; tungod kay ginbuhat ha iyo han GINOO, an iyo kalipay igoliat niyo.