Read Waray Samarenyo Meaning Based Mga Salmo 33 Bible Online

Mga Salmo 33 - Waray Samarenyo Meaning Based bible

Mga Salmo 33

¹Ngatanan nga magtadong, paglipay kamo, tungod hadton mga ginbuhat han GINOO; kamo ngatanan, dayawa hiya niyo, ngatanan nga masinugtanon nga tawo.

²An GINOO aton pagpasalamatan, nga tokar hin mga arpa dinuyogan. Hiya liwat angay naton pagkantahan, upod in mga turunggon nga dinul'san.

³Hiya angay niyo nga pagkantahan, bag-o nga mga kanta nga sinabayan; sanglit an arpa upaya an kaangay, ug igoliat an iyo mga kalipay.

⁴Matuod an mga pulong han GINOO, an iya buhat katataporan nimo.

⁵Hinigugma han GINOO an matadong, lukop an tuna han iya gugma nga dayon.

⁶Ha pulong han Dyos nahimo an kalangitan, an adlaw, an bulan, ngan an kabiton-an.

⁷Iya gintirok an mga kadagatan, ngan ginhipos niya an mga kalawdan.

⁸Tahora an GINOO, bug-os nga tuna, katawhan ngatanan, pasidunggi hiya!

⁹Kalibutan nahimo ha pulong niya, pagsugo niya, ngatanan pinmakita.

¹⁰Han Dyos ginpakyas kanan kanasoran tuyo, waray itugot matuman an ira plano.

¹¹Padayon an iya nahunahunaan, an iya panuyo waray kataposan.

¹²Palaran an nasod nga Dyos an GINOO, sugad man an pinili nga mga tawo.

¹³Tikang ha langit tinmamod an GINOO, ngan kinita niya an ngatanan nga mga tawo.

¹⁴Tikang didto han iya ginhadian, an mga umurukoy iya tinatamdan.

¹⁵Hiya an nabantad han ira hunahuna, han ngatanan nga buhat maaram hiya.

¹⁶An pagdarag-an han hadi diri aada, han makusog nga kasondalohan niya; an usa nga sondalo madinaogon, diri hin kusog nga iya kalugaringon.

¹⁷An para araway nga mga kabayo, hin pakadaog waray mahihimo. An ira kamakusog ug kamaisog, diri makakabulig hin pakadaog.

¹⁸An mga ginbabantayan han GINOO, An natahod ha iya nga mga tawo. An may paglaom natoo ha iya, an nasarig han iya dayon nga gugma.

¹⁹Ira mga kalag iya tatalwason, tikang han kaoripon han kamatayon; ngan iya ini hira pagbubuhion, ha mga panahon nga may-ada katgutom.

²⁰An GINOO an amon ginlalaoman, amon panalipod ngan amon katabang.

²¹Hiya an surok han amon kalipayan, natapod kami han iya mahal nga ngaran.

²²Sanglit, O GINOO, hinaot pa unta, nga maamon an dayuday mo nga gugma; samtang ibinubutang namon an paglaom, dida ha imo, GINOO nga Dyos namon.