Read Waray Samarenyo Meaning Based Mga Salmo 34 Bible Online

Mga Salmo 34 - Waray Samarenyo Meaning Based bible

Mga Salmo 34

¹[57] Pasalamatan ko pirme an GINOO, pagdayaw ha iya di' maundang ako.

²Tungod han iya buhat ak' dadayawon, an ginsakit mamati, magmalipayon!

³An pagkaharangdon han aton GINOO, upod ha akon isangyaw na gud niyo; pagdayaw ha iya mag-urusa kita, aton pagbayawon adton ngaran niya.

⁴Nag-ampo ak' ngan ginbaton han GINOO, gintalwas niya han tanan kahadlok ko.

⁵Tan-aw ha iya ngan magmalipayon man; di' na mahiawod, di' na maalohan.

⁶Nasangpit an kabos ngan nabaton hiya, natalwas han tanan kakurian nira.

⁷Anghel han GINOO bantay, panalipod, an ha GINOO nahadlok ngan natahod.

⁸Ha imo ngahaw, GINOO, usisaha, makikita mo nga maupay gud hiya; palaran an tawo, waray kabaraka, kon iya katalwasan tikang ha iya.

⁹Sanglit kamo nga mga katawhan niya iyo pasidunggan gud an GINOO ta. An tanan nga masinugtanon ha iya diri gud kulangan kinahanglan nira.

¹⁰Bisan mga liyon may'da pagkagutom, may'da nira pagkukulang hin pagkaon; kundi an ha GINOO masinugtanon hin kaupayan diri gud kukulangon.

¹¹Kadi ngan pamatii na ako niyo, kamo nga batan-on nga kasangkayan ko; Ngan susumatan, tututdoan ko kamo han paagi hin pagtahod han GINOO.

¹²Han kinabuhi magpahimulos ka ba? Mabuhi hin dugay ngan malipayon pa?

¹³Ayaw gud pagyinakan hin maraot na, ayaw na pagsinumat hin mga buwa.

¹⁴Likyi'n maraot, an maupay buhata, ungara han kalinaw, talinguhaa.

¹⁵Nagbabantay an GINOO han magtadong, ngan ira mga pagtangis gindudungog.

¹⁶Kontra hiya han nabuhat hin karat-an, ngan limoton hira han ira katawhan.

¹⁷An GINOO namamati han magtadong, kakurian nira iya kukuhaon.

¹⁸Hiraniay gad la an aton GINOO hadton mga nahuhulop na hin duro. Tinatalwas niya adton nagugupong, an nawad-an na han tanan nga paglaom.

¹⁹Damo an gin-aantos nga kakurian hadton mga mag-upay gud nga katawhan; kundi an GINOO may'da katalwasan, tinatalwas hira hini gud ngatanan.

²⁰Han GINOO gudman hira babantayan, di' gud madudugmok ira mga tul-an.

²¹An magraot patayon man han karat-an, an nadumot han magtadong sisirotan.

²²Kanan GINOO nga mga surugoon han GINOO manta hira tatalwason; diri gudman niya hira sisirotan an naayop ha iya nga panalipdan.